Ukraina është goditur gjatë natës nga një ndër sulmet më masive ajrore të muajve të fundit, me rreth 700 dronë sulmues dhe mbi 50 raketa të lëshuara nga forcat ruse në një ofensivë të përbashkët që ka vënë në alarm vendin dhe aleatët ndërkombëtarë.
Presidenti ukrainas Volodymyr Zelensky konfirmoi se të paktën 5 persona kanë humbur jetën dhe 10 të tjerë janë plagosur, ndërsa dëmet në infrastrukturë janë të konsiderueshme, veçanërisht në sektorin energjetik.
“Mbrëmë, Ukraina iu nënshtrua përsëri një sulmi të përbashkët rus: mbi 50 raketa dhe rreth 700 dronë sulmues”, deklaroi Zelensky.
Sulmi ka pasur si objektiv kryesor objektet energjetike dhe infrastrukturën kritike të Ukrainës, ndërsa autoritetet paralajmërojnë se Rusia po përgatit një dimër të vështirë për popullsinë civile, përmes strategjisë së shkatërrimit të burimeve bazë të jetesës.
Në këtë situatë kërcënuese, edhe Polonia dërgoi avionë luftarakë pranë kufirit për të garantuar sigurinë ajrore dhe për të ndihmuar në kontrollin e hapësirës ajrore në rajon.
Një tren që transportonte 110 aktivistë italianë raportohet se i ka shpëtuar për pak një goditjeje, duke shmangur një tjetër tragjedi të mundshme.
Në reagim të menjëhershëm, Grupi G7+ thirri një takim urgjent, duke dënuar intensifikimin e sulmeve dhe duke diskutuar për masa shtesë për të ndihmuar mbrojtjen ajrore të Ukrainës përpara dimrit.
Zelensky i bëri thirrje aleatëve të reagojnë shpejt: “Rusët kanë shënjestruar përsëri gjithçka që siguron një jetë normale për popullin tonë. Na duhet mbrojtje më e madhe dhe zbatim më i shpejtë i marrëveshjeve të mbrojtjes, veçanërisht për mbrojtjen ajrore. Një armëpushim i njëanshëm në qiell është i mundur – dhe vetëm kjo mund të hapë rrugën për diplomaci të vërtetë. Amerika dhe Evropa duhet të veprojnë për të ndaluar Putinin”, shkroi ai në rrjetin social X.
