Kosovë-Pas 20 dështimeve të mëparshme, Kuvendi i Kosovës do të përpiqet edhe një herë këtë të dielë për të konstituuar legjislaturën e nëntë, e dalë nga zgjedhjet e 9 shkurtit. Seanca është parashikuar të nisë në ora 11:00, por tensionet politike mbeten të larta.
Një nga pengesat kryesore mbetet mënyra e votimit për kryeparlamentaren, pasi votimi i fshehtë, i propozuar nga kryesuesi Avni Dehari më 1 maj, është dërguar në Gjykatën Kushtetuese nga partitë politike që kundërshtojnë këtë format.
Lëvizja Vetëvendosje vazhdon të mbështesë kandidaturën e Albulena Haxhiut, por kjo kandidaturë nuk po gjen mbështetje te partitë tjera, të cilat kërkojnë një figurë konsensuale për kryetare.
Pas seancës së fundit më 23 maj, e cila dështoi për herë të 12-të në formimin e komisionit për mbikëqyrjen e votimit, përfaqësuesit e partive theksuan se qëndrimet e tyre mbeten të pandryshuara.
Deputetja e Vetëvendosjes, Donika Gërvalla, fajësoi opozitën për bllokadën në Kuvend, ndërsa nënkryetarja e PDK-së, Vlora Çitaku, akuzoi Lëvizjen Vetëvendosje dhe kryeministrin Albin Kurti për qëndrim pengues, duke theksuar se partia e saj është e gatshme të ofrojë alternativa për tejkalimin e krizës.
Në këtë situatë, ngërçi politik duket se po thellohet, duke rrezikuar stabilitetin dhe funksionimin e institucioneve të Kosovës./Versus.al
