Presidenti ukrainas Volodymyr Zelensky pritet të takohet me kryeministrin e Mbretërisë së Bashkuar Keir Starmer në Downing Street paraditen e sotme.
Takimi do të jetë një shtytje e fundit që kërkesat evropiane të dëgjohen përpara se Donald Trump të takohet me Vladimir Putin për të diskutuar përfundimin e luftës në Ukrainë.
Zelensky dhe udhëheqës të tjerë evropianë, të cilët nuk marrin pjesë në takim, zhvilluan një telefonatë të përbashkët me Trump dje duke përsëritur qëndrimin e tyre, me Starmer që tha se "integriteti territorial" i Ukrainës duhet të mbrohet dhe kufijtë ndërkombëtarë "nuk duhet të ndryshohen me forcë".
Javën e kaluar Trump paralajmëroi se mund të ketë "disa shkëmbime territoresh, në të mirë të të dyjave", duke çuar në frikë se Ukraina mund të duhet të heqë dorë nga disa zona për t'i dhënë fund konfliktit të përgjakshëm që zgjat prej shkurtit të vitit 2022.
Ukraina ka këmbëngulur se nuk do të pranojë kontrollin rus të tokës që ka pushtuar, përfshirë Krimenë, ndërsa Moska dëshiron të ruajë kontrollin. Versus.al
