Të paktën tre persona kanë humbur jetën dhe tetë të tjerë janë plagosur si pasojë e një incidenti të rëndë me armë zjarri që ndodhi në orët e para të mëngjesit të së dielës, në një restorant në Brooklyn.
Sipas autoriteteve, të shtënat ndodhën rreth orës 03:30 të mëngjesit, kur disa persona të armatosur hapën zjarr pas një grindjeje që ndodhi brenda lokalit. Komisionerja e Policisë së NYPD-së, Jessica Tisch, tha se oficerët kanë reaguar menjëherë ndaj thirrjeve të emergjencës dhe kanë mbërritur në vendngjarje pak minuta pas incidentit.
Në skenën e krimit janë gjetur të paktën 36 gëzhoja, çka sugjeron një shkëmbim intensiv zjarri. Viktimat nuk janë identifikuar ende publikisht, ndërsa të plagosurit janë dërguar në spitale të zonës për trajtim.
Hetimet janë në vijim dhe autoritetet janë në kërkim të personave të dyshuar, të cilët deri tani nuk janë identifikuar. Policia e New York-ut nuk ka bërë ende asnjë arrestim në lidhje me ngjarjen.
Ky incident e shton shqetësimin për rritjen e dhunës me armë në qytet dhe vjen në një periudhë kur komuniteti po përpiqet të përballojë pasojat e ngjarjeve të ngjashme të mëparshme. Policia u bën thirrje qytetarëve që kanë informacion të kontaktojnë autoritetet. /Versus.al
