Presidenti amerikan Donald Trump është bërë gjithnjë e më pesimist në lidhje me mundësinë e ndalimit të luftës në Ukrainë dhe me arritjen e një takimi midis Vladimir Putin dhe Volodymyr Zelensky, sipas dy zyrtarëve të lartë të administratës së tij, cituar nga NBC News.
Megjithatë, ai nuk ka humbur tërësisht shpresën. Para pak kohësh mori pjesë në një telefonatë me Zelensky dhe liderët evropianë, ku theksoi se Evropa duhet të ndalojë blerjen e naftës ruse, në mënyrë që të mos financojë luftën në Ukrainë. Për më tepër, ai kërkoi që liderët evropianë të shtojnë presionin ekonomik ndaj Kinës për mbështetjen që i jep Rusisë.
Mes premtimit dhe realitetit
Gjatë fushatës së vitit 2024, Trump premtonte se do të mbyllte konfliktin “në 24 orë” pas marrjes së detyrës. Më vonë, ai sqaroi se ishte një fjali “figurative”, duke pranuar se konflikti ishte më kompleks nga sa mendonte. Pavarësisht nivelit të pritshëm nga takimi i mbajtur më 15 gusht në Alaska, deri tani nuk është arritur asnjë rezultat konkret.
Ndërkohë që negociatat mbeten të ngadalta, Putin u shpreh se një takim me Zelenskyn është i mundur vetëm në Moskë, vend që Ukraina refuzon për shkak të sigurisë. Zelensky është i gatshëm të takohet me Putin, por vetëm në një vend neutral.
