Ekspertët mjeko-ligjorë po punojnë mes rrënojave të një konvikti studentor në Starobilsk, në rajonin e Luhanskut të kontrolluar nga Rusia, pas një sulmi të rëndë që autoritetet ruse ia atribuojnë Ukrainës. Sipas zyrtarëve lokalë, nga sulmi kanë humbur jetën 21 persona, shumica vajza të reja që ndodheshin në godinën e kolegjit pedagogjik.
Pamjet nga vendngjarja tregojnë ndërtesën e shkatërruar pothuajse tërësisht, me mure të çara, dritare të thyera dhe grumbuj metalesh e betoni të shpërndarë në oborr. Hetuesit rusë kanë nisur grumbullimin e provave për sulmin që, sipas tyre, u krye me disa valë dronësh.
Komisionerja ruse për të Drejtat e Njeriut, Yana Lantrova, deklaroi se ndaj godinës u lëshuan gjithsej 16 dronë, duke pretenduar se sulmi u krye në momentin kur studentët po tentonin të largoheshin nga ndërtesa.
Nga ana tjetër, ushtria ukrainase ka mohuar përgjegjësinë për goditjen e konviktit, duke deklaruar se objektivi i forcave të saj ishte një njësi elitare e komandimit të dronëve ruse në zonë dhe se operacioni ishte kryer në përputhje me ligjin ndërkombëtar humanitar.
Pas ngjarjes, presidenti rus Vladimir Putin urdhëroi ushtrinë të përgatisë opsione për kundërpërgjigje ndaj Ukrainës. Vetëm pak orë më vonë, Rusia ndërmori një nga bombardimet më të rënda ndaj Kievit që nga fillimi i luftës, duke lëshuar qindra dronë dhe raketa mbi kryeqytetin ukrainas dhe zonat përreth. Sulmet lanë të paktën katër të vdekur dhe përfshinë edhe përdorimin e një rakete hipersonike ruse “Oreshnik”.
