Volodymyr Zelensky ka marrë zyrtarisht një plan nga pala amerikane që mund të përshpejtojë përpjekjet diplomatike për t'i dhënë fund luftës në Ukrainë, tha zyra e presidentit ukrainas.
Me këtë deklaratë, Kievi duket se po mban një qëndrim të ekuilibruar, duke mos e refuzuar dhe as duke e pranuar planin përpara se të vazhdojë me bisedimet e nivelit të lartë.
"Volodymyr Zelensky ka marrë zyrtarisht një draft marrëveshjeje nga pala amerikane, e cila, sipas amerikanëve, mund ta bëjë të mundur diplomacinë ", tha zyra e Zelensky në Telegram.
E njëjta deklaratë vuri në dukje se Zelensky pret të diskutojë mundësitë diplomatike në zhvillim dhe "pikat kryesore të nevojshme për paqen" me Trump në ditët në vijim. Diku tjetër në deklaratë, thuhet se "u ra dakord të punohet mbi pikat e planit, në mënyrë që t'i jepet fund dinjitoz luftës. Që nga momentet e para të pushtimit rus, Ukraina ka kërkuar paqe dhe ne mbështesim të gjitha propozimet thelbësore që mund të sjellin paqen e vërtetë më afër.
Që nga fillimi i vitit, Ukraina ka mbështetur propozimet e Presidentit Trump për t'i dhënë fund gjakderdhjes. Ne jemi gati tani të bashkëpunojmë në mënyrë konstruktive me palën amerikane dhe partnerët tanë në Evropë dhe në botë, në mënyrë që rezultati të jetë paqja".
Çfarë parashikon plani amerikan - Moska është e gatshme të bëjë lëshime (të paspecifikuara)
Sipas planit amerikan, detajet e të cilit u zbuluan dje në disa media ndërkombëtare, Shtetet e Bashkuara dhe vendet e tjera janë të detyruara të njohin sovranitetin e Rusisë mbi Krimenë , Donbasin dhe territore të tjera që Ukraina do të detyrohet t'i lëshojë.
Në këmbim, Kievi do të marrë garanci sigurie amerikane dhe evropiane, si dhe do të krijohet një zonë e çmilitarizuar në zonat nga të cilat do të tërhiqen trupat ukrainase.
Sipas Axios, i cili citon një zyrtar anonim amerikan, linja e kontaktit midis palëve ndërluftuese në rajonet Kherson dhe Zaporizhia do të "ngrihet" dhe Rusia do të detyrohet t'i kthejë disa zona Ukrainës.
Ushtria ukrainase do të reduktohet ndjeshëm dhe do të privohet nga armët me rreze të gjatë veprimi, vendosja e trupave të huaja do të ndalohet në Ukrainë dhe rusishtja do të bëhet gjuha zyrtare. Bloomberg raportoi se plani i ri amerikan parashikon gjithashtu heqjen e sanksioneve kundër Rusisë.
Në të njëjtën kohë, burime të Kyiv Independent raportuan se Moska do të zotohet të mos sulmojë Ukrainën ose vendet e tjera evropiane në të ardhmen dhe do ta përfshijë këtë angazhim në ligjin rus.
Në të njëjtin kontekst, një zyrtar amerikan tha se Rusia pritet të bëjë lëshime si pjesë e propozimit, megjithëse nuk specifikoi se çfarë mund të përfshijnë këto.
