Shtatë elefantë u vranë dhe një u plagos kur një tren pasagjerësh u përplas me një tufë kafshësh në Indinë verilindore, pa të lënduar midis pasagjerëve, sipas autoriteteve lokale.
Aksidenti ndodhi në shtetin e Assamit, ku jetojnë më shumë se 4,000 elefantë të egër nga rreth 22,000 që jetojnë në vend. Zona konsiderohet kritike për ruajtjen e popullatës së elefantëve aziatikë.
Zyrtari i policisë së Assamit, B.V. Rakesh Reddy, tha se shtatë pakidermë u vranë në vend dhe një tjetër u plagos rëndë. Përplasja nxori nga shinat pesë vagona të trenit, i cili po udhëtonte nga Mizorami për në New Delhi.
Autoritetet kanë vendosur kufizime shpejtësie në linjat hekurudhore që kalojnë zonat e migrimit të elefantëve, por incidenti ndodhi jashtë zonave të caktuara, tha zëdhënësi i Hekurudhave Indiane, Kapinjal Kishore Sharma.
"Makinisti i trenit, kur pa tufën e elefantëve, aktivizoi frenën e emergjencës. Por kjo nuk e parandaloi përplasjen", tha ai.
Rritja e konflikteve njeri-elefantë
Shpyllëzimi dhe zhvillimi i vendeve të ndërtimit pranë habitateve natyrore të kafshëve po i detyron elefantët të largohen nga zonat e mbrojtura në kërkim të ushqimit. Kjo lëvizje rrit rrezikun e kontaktit me njerëzit dhe automjetet.
Sipas të dhënave parlamentare, 629 persona vdiqën në sulme elefantësh në të gjithë Indinë në vitet 2023–2024, duke nxjerrë në pah ashpërsinë e problemit të bashkëjetesës midis njeriut dhe jetës së egër në vend./Versus.al
