Siç ishte paralajmëruar më herët, pas propozimit të kryebashkiakut të Himarës, Vangjel Tavo, më 23 janar këshilli bashkiak miratoi ngritjen e shoqërisë “Himara Invest” sh.p.k, entitet i pavarur që do të administrojë pronat e bashkisë si subjekt privat.
Kjo çështje ka interes të madh publik për shkak se bregdeti i Himarës dhe fshatrat përreth cilësohen si zonat me vlerën më të lartë turistike në Shqipëri. Megjithatë, mungesa e transparencës nga ana e bashkisë ka ngritur shqetësime.
Më herët, këshilltarët bashkiakë të PD e kishin kundërshtuar këtë propozim duke e cilësuar si “strukturë që funksionon si biznes privat”. Kjo mënyrë veprimi do të shmangte rezistencën e subjekteve që i kanë aktualisht këto prona me qira, pasi në praktikë do të ishte vetë bashkia ajo që i rimerr.
Versus.al iu drejtua bashkisë së Himarës për të marrë më shumë informacion lidhur me “Himara Invest”, domosdoshmërinë e saj dhe nëse ka prona të caktuara që janë marrë në administrim, por nuk morëm asnjë përgjigjie deri në publikimin e këtij artikulli.
Në kushtet kur Himara njihet si zonë problematike sa i takon pronave, ky entitet i pavarur vetëm sa ka shtuar paqartësinë mes banorëve pasi nuk ka asnjë sqarim se kush do ta mbikëqyrë dhe kush do të garantojë për sigurinë e pronave të himariotëve duke qenë se bashkia ‘del jashtë loje’. Versus.al
