Konflikti mes Iranit, Izraelit dhe Shteteve të Bashkuara ka hyrë në një fazë gjithnjë e më të rrezikshme, duke u zgjeruar përtej territoreve të dy vendeve dhe përfshirë disa shtete të Lindjes së Mesme.

Luftimet intensive, përdorimi i raketave dhe dronëve, si dhe sulmet ndaj infrastrukturës ushtarake dhe civile kanë rritur shqetësimet për një konflikt rajonal me pasoja globale.

Presidenti iranian Masoud Pezeshkian paralajmëroi se Teherani do të reagojë ndaj çdo përpjekjeje separatiste kurde, ndërsa grupet kurde në Irak raportuan sulme që plagosën anëtarë të tyre.

Në të njëjtën kohë, SHBA po shqyrton mundësinë e mbështetjes së forcave kurde për të nxitë një kryengritje kundër regjimit iranian.

Rajoni i Gjirit është gjithashtu prekur, me sulme raketore dhe dronësh në hapësirën ajrore të Kuvajtit dhe Bahreinit, ndërsa Emiratet e Bashkuara Arabe kanë neutralizuar dhjetëra dronë iranianë.

'Duke siguruar epërsi ajrore, ushtria izraelite po kalon në fazën tjetër të luftës kundër Iranit', tha shefi i shtabit të Forcave të Mbrojtjes së Izraelit (IDF), gjenerallejtënant Eyal Zamir, në një mesazh të regjistruar të enjten në mbrëmje.

"Tani po kalojmë në fazën tjetër të fushatës, në të cilën do të intensifikojmë sulmet kundër themeleve të regjimit dhe aftësive të tij ushtarake", tha Zamir, duke shpjeguar se brenda 24 orëve të para të Operacionit "Luani që Rënkon", forca ajrore izraelite "hapi rrugën për në Teheran".

"Kemi lëvizje të tjera surprizë që nuk kam ndërmend t'i zbuloj", shtoi shefi i ushtrisë izraelite.

NATO ka rritur nivelin e mbrojtjes raketore pas rrëzimit të një rakete iraniane drejt hapësirës ajrore të Turqisë.

Në planin diplomatik, presidenti amerikan Donald Trump ka shprehur interes për të influencuar zgjedhjen e udhëheqësit të ardhshëm të Iranit, ndërsa Izraeli ka paralajmëruar intensifikim të sulmeve kundër kapaciteteve ushtarake iraniane.

Konflikti ka ndikime edhe në ekonominë globale: çmimet e naftës janë rritur dhe trafiku i cisternave në Ngushticën e Hormuzit është ndërprerë përkohësisht. Analiza e Center for Strategic and International Studies tregon se vetëm 100 orët e para të operacionit amerikan kundër Iranit kanë kushtuar rreth 3.7 miliardë dollarë.

Vendet perëndimore po evakuojnë qytetarët e tyre nga rajoni dhe disa shtete evropiane kanë rritur praninë ushtarake për të mbrojtur interesat dhe aleatët e tyre. Analistët paralajmërojnë se konflikti mund të përshkallëzohet në një përballje më të gjerë rajonale me pasoja globale./Versus.al

Presidenti Donald Trump përmes rrjete sociale njoftoi se ka shkarkuar nga detyra  Sekretaren e Sigurisë Kombëtare Christie Noem dhe në vend të saj është propozon  senatorin republikan të Oklahomës Markëayne Mullin

Trump tha se do ta emëronte Noem si “E dërguar të posaçme për sigurimin e Amerikës”, një iniciativë e re sigurie e fokusuar në hemisferën perëndimore.

Noem është sekretarja e parë që lë mandatin e dytë të Trump. Largimi i saj vjen pas një periudhe të trazuar me politikat e saj të zbatimit të ligjit për imigracionin, të cilat kanë shkaktuar protesta dhe padi.

Noem është përballur me kritika të ashpra, kryesisht për mënyrën se si e trajtoi goditjen kundër imigracionit dhe reagimin e departamentit të saj ndaj vrasjeve të dy protestuesve në Minneapolis nga oficerët e zbatimit të ligjit.

Ish-guvernatorja e Dakotës së Jugut është kritikuar gjithashtu për mënyrën se si departamenti i saj përdori miliarda që i ishin vënë në dispozicion nga Kongresi.

Zhgënjimet për zbatimin e politikave të ashpra të imigracionit të Trump, veçanërisht pas tragjedisë në Minneapolis, si dhe trajtimi i fatkeqësive natyrore nga ana e saj, i hapën rrugën rënies së saj.

Në seancat dëgjimore në kongres këtë javë, ajo u kritikua ashpër nga demokratët dhe disa republikanë për mënyrën se si e trajtoi situatën.

Përveç çështjeve të imigracionit, Noem është kritikuar edhe nga republikanët për ritmin me të cilin u miratua financimi i emergjencës përmes Agjencisë Federale të Menaxhimit të Fatkeqësive (FEMA), si dhe për reagimin e përgjithshëm të administratës Trump ndaj fatkeqësive natyrore.

Mullin do të duhet të konfirmohet nga Senati, por sipas ligjit federal që rregullon vendet e lira të punës në degën ekzekutive, ai mund të shërbejë si sekretar i përkohshëm i Sigurisë Kombëtare derisa të përfundojë procesi i konfirmimit të tij./Versus.al

Edi Rama

Kryeministri Edi Rama ka publikuar një postim në rrjetet sociale ku dënon fuqishëm sulmin e ndërmarrë ndaj territorit të Azerbajxhanit, i cili ka goditur infrastrukturën civile në rajonin e Nahçivanit dhe ka plagosur civilë.

Sipas Ramës, sulmi i Iranit kundër vendeve fqinje përfaqëson një akt agresioni të rëndë dhe të papranueshëm, ndërsa populli azerbajxhanas meriton vetëm respekt, siguri dhe liri nga frika.

Ai thekson se Azerbajxhani është një mik dhe aleat i çmuar i Shqipërisë dhe ka fituar respekt global për qëndrueshmërinë dhe përkushtimin ndaj zhvillimit dhe bashkëpunimit ndërkombëtar.

Kryeministri shprehet se çdo përpjekje e regjimit të Teheranit për të destabilizuar vendet fqinje duhet të dënohet qartë dhe të shërbejë si arsye për izolimin e plotë të këtij regjimi në arenën ndërkombëtare.

Ai nënvizon gjithashtu se kur sulmohet infrastruktura civile dhe shkelet sovraniteti, vijat midis agresionit dhe terrorizmit zhduken.

Postimi i plotë i kryeministrit Rama: 

Sulmi i ndërmarrë kundër territorit të Azerbajxhanit, që ka vënë në shënjestër infrastrukturën civile në rajonin e Nahçivanit dhe ka plagosur civilë, është edhe një akt tjetër i rëndë dhe i papranueshëm agresioni nga Republika Khomeiniste e Iranit kundër vendeve fqinje, “mëkati” i vetëm i përbashkët i të cilave është se shkëlqejnë në skenën botërore përmes zhvillimit, prosperitetit dhe hapjes, duke përmirësuar çdo ditë jetën e popujve të tyre dhe duke e bërë Iranin të duket edhe më i errët dhe më i verbër nën regjimin e tij satanik.

Azerbajxhani është një mik dhe aleat i çmuar i Shqipërisë, një komb që është ngritur lart që prej rifitimit të pavarësisë nga Bashkimi Sovjetik. Krenaria e tij kombëtare, qëndrueshmëria dhe përkushtimi ndaj zhvillimit, të ndërthurura me gatishmërinë për moderim dhe me krahët e hapur për bashkëpunim me të gjithë, kanë fituar respektin e shumëkujt në mbarë botën.
Populli azerbajxhanas, ashtu si edhe popujt e vendeve të tjera që janë vënë pa arsye në shënjestër ditët e fundit, meriton vetëm respekt, siguri dhe liri nga frika.

Çdo përpjekje e regjimit të lig në Teheran për të terrorizuar popullsinë civile ose për të destabilizuar vende fqinje paqedashëse me qëllim që t’i provokojë ato kundër përgjigjes plotësisht të justifikuar të Shteteve të Bashkuara dhe Izraelit ndaj Republikës Khomeiniste, jo vetëm që duhet të dënohet me qartësinë më të madhe, por duhet të shërbejë edhe si një arsye tjetër për ta izoluar plotësisht atë regjim në çdo mënyrë të mundshme nga çdo pjesë e mundshme e botës.

Kur infrastruktura civile e vendeve të tjera vihet në shënjestër dhe kufijtë sovranë shkelen, vija ndarëse midis agresionit dhe terrorizmit zhduket. Pikërisht për këtë arsye ka ardhur koha që të gjitha shtetet dhe institucionet që besojnë në stabilitet, në rendin ndërkombëtar të bazuar në rregulla dhe në bashkëjetesën paqësore, jo thjesht të distancohen nga një regjim që në mënyrë të përsëritur eksporton dhunë dhe frikë përtej kufijve të tij, por të bien dakord për atë që ai në të vërtetë është: një Shtet Terrorist.

Ne qëndrojmë të palëkundur me Azerbajxhanin, me udhëheqjen e tij të fortë dhe me popullin e tij krenar.

Rruga përpara duhet të jetë e qartë. Agresioni duhet të izolohet dhe agresorët duhet të dënohen pa asnjë mëdyshje. Ata që zgjedhin rrugën e dhunës duhet të përballen me unitetin gjithnjë e më të madh të atyre që zgjedhin paqen.Versus.al

Dy civilë janë plagosur nga një sulm me dron iranian në Azerbajxhan, thotë ministria e jashtme e Azerbajxhanit.

"Një dron goditi ndërtesën e terminalit të aeroportit në Republikën Autonome të Nakhçivanit, ndërsa një dron tjetër ra pranë një ndërtese shkolle në fshatin Shakarabad", thotë ministria.

Sulmi me dron dëmtoi një ndërtesë aeroporti dhe plagosi dy civilë.

Ambasadori iranian në Azerbajxhan është thirrur tani, thotë ministria, ku "një protestë e fortë do t'i përcillet palës iraniane dhe do të paraqitet një notë përkatëse proteste". Versus.al

Bombardimet e SHBA-së dhe Izraelit në Iran kanë shërbyer si një katalizator për një fushatë të re dezinformimi në gjuhën shqipe nga media ruse, iraniane dhe nga ato që riprodhojnë qëndrimet e këtyre të fundit.

Një analizë e teksteve të publikuara së fundmi në rrjete të ndryshme tregon një shkrirje të narrativave të makinerisë shtetërore ruse, si rrjeti i dezinformimit “Pravda” në shqip apo ideologët e afërt me Kremlinin, dhe mediave të linjës iraniane që operojnë në gjuhën shqipe, si Gazeta Impakt apo Pars Shqip.

Të dyja këto rryma po përdorin të njëjtën gjuhë apokaliptike, duke pikturuar Perëndimin në tërësi, si edhe SHBA-në dhe Izraelin, si “Antikrishti” apo “Baali” (një emër i përdorur për djallin). Ato e lidhin luftën në Iran me ekspozimin e dosjeve të Jeffrey Epstein, një financier amerikan i dënuar për ngritjen e një rrjeti të trafikimit seksual të të miturave, i cili shfrytëzoi lidhjet me elitat globale për të fshehur krimet e tij.

Vdekja e tij në burg, kontaktet që ai kishte me një numër të madh personash me pushtet dhe mungesa e hetimeve të thelluara janë bërë një mjet i preferuar për makineritë e propagandës dhe teoritë konspirative që kërkojnë të godasin Perëndimin ose vlerat perëndimore.

Kjo valë propagande vjen pasi Shtetet e Bashkuara dhe Izraeli nisën një fushatë masive dhe të koordinuar sulmesh ushtarake kundër Iranit më 28 shkurt, me pretendimin se po godisnin infrastrukturën bërthamore, qendrat ushtarake dhe vetë udhëheqjen e lartë iraniane.

Nga sulmet raportohet se u vra edhe Udhëheqësi Suprem i Iranit, Ajatollah Ali Khamenei. SHBA-ja dhe Izraeli e justifikuan sulmin me dështimin e negociatave mbi programin bërthamor të Teheranit.

Sulmet u pasuan nga një kundërpërgjigje e menjëhershme dhe e gjerë nga ana e Teheranit, i cili lëshoi qindra raketa balistike dhe dronë – jo vetëm drejt Izraelit, por edhe drejt bazave ushtarake amerikane të vendosura në vendet fqinje arabe si Emiratet e Bashkuara Arabe, Katari, Kuvajti dhe Bahreini.

Në ditët e para të marsit, ky përshkallëzim i paprecedentë e ka zhytur Lindjen e Mesme në një luftë të hapur rajonale, me qindra viktima dhe hapësira ajrore të mbyllura.

 “Kulti i Baalit” dhe apokalipsi

Tekstet e publikuara prej mesit të shkurtit dhe të intensifikuara pas sulmeve të SHBA-së dhe Izraelit kundër Iranit janë një përpjekje për ta zhvendosur konfliktin nga rrafshi politik në atë fetar.

Alexander Dugin, i njohur si arkitekti ideologjik i politikës së jashtme të Rusisë së Vladimir Putinit, në një shkrim të fundit e cilëson Perëndimin si “Qytetërimin e Baalit” – një referencë biblike për idhujtarinë dhe sakrificat njerëzore – dhe Iranin si rezistencën e fundit kundër djallit.

Ai paralajmëron se rënia e Iranit do t’i hapte rrugë shkatërrimit të Rusisë, duke bërë thirrje për një luftë të shenjtë dhe radikale. Shkrimi i Dugin, i cili në këtë tekst vendos shenja barazimi mes bombardimeve në Iran dhe atyre kundër regjimit të Slobodan Millosheviçit gjatë luftës në Kosovë, u publikua në shqip nga Gazeta Impakt, një hapësirë e lidhur me Olsi Jazexhin, një historian i njohur për qëndrimet e tij pro Teheranit zyrtar dhe mbështetjen e qëndrimeve të Dugin.

Si për të kthyer favorin, Dugin në faqen e tij në Facebook ndau një postim të Jazexhit, në të cilin pretendohej në mënyrë të rreme se Irani kishte bombarduar zyrat e qeverisë së Izraelit dhe se fati i kryeministrit Benjamin Netanyahu nuk dihej.

Faqet e lidhura me Dugin, Gazeta Impakt dhe Jazexhi kanë publikuar gjithashtu karikatura të ngjashme në të cilat bëhet thirrje për një aleancë të krishterë dhe myslimane kundër “zionizmit”. Karikatura përpiqet të pikturojë Perëndimin si djallëzor, ndërsa skandali i Epstein përdoret si fytyra përfaqësuese e Perëndimit apo Izraelit.

Një profil në X i faqes së radios së Iranit në Shqipëri ndau një mesazh të ngjashëm, duke këmbëngulur se bombardimi i një shkolle fillore vajzash në Minab më 28 shkurt (kur nisi edhe sulmi i SHBA-së ndaj Iranit), që raportohet se ka vrarë 175 nxënëse, ishte i qëllimtë dhe përbënte një “kurban” që SHBA-ja dhe Izraeli i bënin “Baalit”.

Autoritetet amerikane ende nuk kanë një qëndrim zyrtar mbi bombardimin e shkollës, ndërsa organizatat e të drejtave të njeriut kanë kërkuar hetim, duke e cilësuar atë një krim lufte.

Përdorimi i skandalit të Epstein

Të dy linjat e propagandës dhe dezinformimit – qoftë ajo ruse e përkthyer automatikisht në shqip nga rrjeti Pravda, qoftë ajo iraniane përmes mediave Pars dhe Gazeta Impakt – i lidhin bombardimet me skandalin Epstein.

Pravda, duke iu referuar kryesisht kanaleve afër Kremlinit në Telegram, këmbëngul se bombardimet janë një përpjekje e presidentit amerikan Donald Trump për të tërhequr vëmendjen nga lidhja e tij e pretenduar me Epstein.

Në këtë përpjekje, publikimet e Pravda tërheqin paralele me bombardimin e regjimit të Millosheviçit nga NATO në përpjekje për të ndaluar gjenocidin në Kosovë, duke përsëritur një linjë të njohur propagande dhe lajmesh të rreme që i lidh bombardimet me skandalin e presidentit Bill Clinton dhe Monica Lewinsky.

Ndërhyrja e NATO-s në Kosovë në vitin 1999 u mbështet nga komuniteti ndërkombëtar dhe erdhi si përgjigje ndaj një krize humanitare të dokumentuar, pas dëbimit masiv të qindra mijëra shqiptarëve nga Kosova.

Në të njëjtën linjë me mediat ruse, edhe Gazeta Impakt e etiketon ushtrinë e SHBA-së si “ushtria e Epstein”.

“Çfarë do të ndodhte nëse ushtria e Epstein – e Trumpit – ka vrarë Khamenein?”, shkruhet në një artikull të publikuar më 1 mars, i cili e barazon Khamenein me Jezu Krishtin.

Lideri iranian, i cili raportohet se u vra nga bombardimet e Izraelit në një bunker në Teheran, cilësohet nga organizatat e të drejtave të njeriut si përgjegjës për vrasjen e mijëra iranianëve të pafajshëm. BIRN

Forcat e Armatosura të Iranit kanë mohuar se kanë hedhur ndonjë raketë drejt territorit turk, duke këmbëngulur se Irani respekton sovranitetin e Turqisë, thanë ata në një deklaratë të publikuar nga media shtetërore.

Deklarata iraniane e së enjtes vjen pasi Ministria e Mbrojtjes Kombëtare e Turqisë tha të mërkurën se një raketë balistike e lëshuar nga Irani drejt hapësirës ajrore turke pasi kaloi Sirinë dhe Irakun u shkatërrua nga sistemet ajrore dhe të mbrojtjes raketore të NATO-s mbi Mesdheun lindor.

Nuk ishte e qartë se ku ishte drejtuar raketa.

"Një municion balistik i lëshuar nga Irani, i cili u zbulua duke kaluar nëpër hapësirën ajrore të Irakut dhe Sirisë dhe duke u drejtuar drejt hapësirës ajrore turke, u aktivizua në kohën e duhur nga asetet ajrore dhe të mbrojtjes raketore të NATO-s të vendosura në Mesdheun lindor dhe u bë joaktiv", tha ministria në një deklaratë të mërkurën.

Tha se nuk kishte viktima apo të lënduar, duke shtuar se Ankaraja rezervon të drejtën për t'iu përgjigjur çdo veprimi armiqësor kundër saj, ndërsa i paralajmëroi palët të përmbahen nga përshkallëzimi i konfliktit.

Në një fjalim mbrëmjeje drejtuar kombit, Presidenti i Turqisë, Recep Tayyip Erdogan, tha se vendi po "merrte të gjitha masat e nevojshme paraprake" në konsultim me aleatët e saj të NATO-s dhe po lëshonte "paralajmërime në termat më të qarta për të parandaluar që incidente të ngjashme të ndodhin përsëri".

"Nëse ne, si komb, duam të jetojmë në paqe dhe qetësi... duhet të rrisim vazhdimisht aftësitë tona parandaluese. Në këto kohë të vështira... nuk po lëmë absolutisht asgjë në dorë të rastësisë në lidhje me sigurinë e kufijve dhe hapësirës ajrore tona", tha ai. Versus.al