Çfarë do të gjeni në brendësi
*Kryeministri Edi Rama zhvilloi sot takim me sipërmarrës të prodhimit të vajit të ullirit në Berat ku foli për investime të ndryshme. *Ai tha se Berati është qyteti me numrin më të madh të shqiptarëve të kthyer nga emigrimi për shkak të mundësive që ofronte për ta. Ndërsa sërish përsëriti deklaratat e shpeshta gjatë këtyre ditëve të fundit duke thënë se kurrë korrupsioni nuk ka qenë më i ulët në Shqipëri, pavarësisht skandaleve të shumta dhe zbulimit të aferave në institucione të ndryshme publike. *Mes të tjerash zbuloi gjithashtu se vendimi për heqjen e subvencionit për naftën ishte marrë për shkak se kishte patur abuzime me këtë skemë dhe karburanti ishte përdorur për makina në qytet.
“Mos e ul kokën për asgjë kryeministër, të duartrokasim”, Rama-pensionistes: Do të marr të trajnosh deputetët e PS
Një prej zonjave të pranishme në takimin e kryeministrit Edi Rama me pensionistët në Berat, deklaroi se Partia Socialiste ka bërë më shumë se kushdo tjetër për Beratin. Përsa i takon skandaleve dhe aferave korruptive, pensionistja i kërkoi Ramës që të mos e ulë kokën për asgjë dhe se ata që kanë bërë faj të dalin para drejtësisë. Nga ana tjetër Rama iu përgjigj me batutë duke i thënë se do ta merrte të trajnonte deputetët e PS.
Pjesë nga takimi:
Pensionistja: Kur e filluat fjalën më erdhi pak si keq. Ne jemi një familje, ju ju konsiderojmë si fëmijët tanë. Kur ka ardhur fillimisht Ervini, e ka gjetur Beratin pa ujë. Kjo ishte gjëja më e madhe që bëri, tani kemi 24 orë ujë. Dikush do të thoshte pse, gjë e madhe është? Shumë e madhe është, sepse kështu fillojnë. Pas ujit u zbukuruan lagjet, mori ngjyra të tjera qyteti ynë, u hapën sheshe. Unë dua që ju të jeni krenar këtu midis nesh.
Vetëm PS i ka dhënë këtij vendi atë që s’e kanë dhënë të gjitha sistemet që kanë kaluar. Mund të ketë një bum tjetër suksesi ekonomia jonë. Duhet të jemi optimistë, duhet të duartrokasim fort për ato që keni bërë, zoti Kryeministër. Ju falënderoj nga zemra që në krah keni marrë dy personat më të mirë të Beratit. Kështu ta mbajnë socialistët njëri-tjetrin. Ata që vjedhin dhe bëjnë, le të merret drejtësia, ne nuk kemi punë me ta. Ju mos e ulni kokën se çfarë thuhet.
Rama: Pas kësaj oratorie, vetëm të të marr ndonjë ditë të trajnoshe deputetët e Partisë Socialiste. Versus.al
“Sikur të mbyllnim parlamentin me pagat e deputetëve”, Rama-pensionistëve: Do ishin pikë uji në oqean për ju
Pas takimit me sipërmarrësit e vajit të ullirit në Berat, kryeministri Edi Rama zhvilloi edhe një takim me pensionistët të cilëve u tha se vetëm së fundmi ishte e mundur që të bëhej një plan për t’i mbështetur.
Duke përsëritur se skema e pensioneve ishte në gjendje shumë të keqe kur PS erdhi në qeveri, Rama tha se që të ketë rritje pensionesh, fillimisht duhet rritur ekonomia. Ndërsa mori si shembull pagat e deputetëve, kryeministri argumentoi se edhe nëse Kuvendi do mbyllej dhe pagat e tyre do shpërndaheshin për pensionistët, sërish nuk do kishte asnjë ndikim.
“E para realisht më vjen mirë që kam qëndruar në këtë detyrë deri kur u bë e mundur që më në fund të përcaktonim një plan financiar të mbështetur nga buxheti. Një buxhet jo i mjaftueshëm, por i arsyeshëm. Rritja e pensioneve ka qenë më e vështira dhe është gjithmonë më e vështira. Ju e dini që pensionet funksionojnë në bazë të një skeme të sigurimeve shoqërore. Nëse skema e sigurimeve shoqërore nuk është solide, por në vend që të jetë një skemë solide është një gropë që ne e trashëguam atëhere, bëhet tejet e vështirë.
Kur më pyesnit ju kam thënë vazhdimisht që e kemi prioritet, por duhet të rrisim ekonominë, që t’i qasemi këtij prioriteti. Shpesh herë sillej në vëmendje që ‘jo po rriten pagat e deputetëve’, pagat e deputetëve ata janë 140, sikur ta mbyllnim fare Parlamentin, larg qoftë, dhe të shpërndanim pagat e deputetëve do të ishte një pikë uji në oqean. Ishte shumë stresuese pamundësia dhe erdhi momenti ku pamë qartë mundësinë”, tha Rama. Versus.al
Heqja e subvencionit të fermerëve për naftën, Rama: Abuzonin, e përdornin për makina në qytet
Gjatë takimit me sipërmarrësit e prodhimit të vajit të ullirit në Berat, kryeministri Edi Rama foli edhe për heqjen e subvencioneve për naftën e fermerëve. Sipas tij, shkak për këtë vendimmarrje është bërë arsyeja se shumë prej fermerëve abuzonin duke e përdorur naftën për qëllime të tjera që nuk kishin lidhje me bujqësinë.
“Rimbursimi i TVSH-së me 10%, që do të thotë, kemi pasur mbi 60 mijë që kanë marrë naftë, ndërkohë që ne e dimë shumë mirë që fuqia prodhuese dhe bazat prodhuese nuk e kanë këtë lloj proporcioni. Nuk kanë 60 mijë aktorë. Në këtë sens, ne nuk kemi hequr mbështetjen për asnjë që ka nevojë edhe për naftë, por kemi hequr mundësinë që nafta të abuzohet dhe përdoret për qëllime që nuk kanë lidhje me bujqësinë, kjo është e vërteta. Ose kemi dalë në atë konkluzion edhe për një fakt tjetër, që shumë njerëz që punojnë tokat e të tjerëve, kanë qenë të detyruar të marrin naftën dhe të ua japin të tjerëve, është dhënë për sipërfaqe/ hektar, ai tjetri ka pasur një Mercedez në qytet dhe ka marrë naftën nga ai që punon tokën atje.
Ata të cilët kanë prodhuar në tokat e të tjerëve dhe naftën ia kanë dhënë atyre të tjerëve kanë vazhduar të rriten, nuk është kjo ajo që e rrit prodhimin. Ne kemi qenë të detyruar që të provojmë disa rrugë, ndërsa kjo rrugë tani, vjen edhe si rezultat i rritjes së vetëdijes së formalizimit”- deklaroi Rama. Versus.al
"Një mik më tha se dukem arrogant kur e them", Rama: Korrupsioni, më i ulët se kurrë më parë
Kryeminsitri Edi Rama zhvilloi sot një takim me sipërmarrës të vajit të ullirit në Berat për të folur lidhur me rritjen e pagave në bujqësi dhe investimet e qeverisë. Ndër të tjera, Rama iu kthye sërish temës së përmendur në çdo takim të zhvilluar prej tij gjatë ditëve të fundit, korrupsionit.
Kreu i qeverisë vijoi të këmbëngulë se sot në Shqipëri ka më pak korrupsion se kurrë pavarësisht se rrëfeu se një mik i tij e kishte këshilluar që të bënte kujdes kur e thoshte sepse ngjante pak arrogant.
“E vërteta bëhet copash dhe gëlojnë lloj-lloj thashethemesh, shpeshherë të thuash të vërtetën duket si sfidë. Një miku im po më thoshte: ki pak më kujdes sepse dukesh arrogant kur thua se Shqipëria ka më pak korrupsion se ç’kishte dhe asnjëherë si sot korrupsioni nuk është luftuar në Shqipëri. Kjo është e vërteta dhe unë jam i gatshëm të përballem me këdo për sa kohë jemi në fushën e fakteve, kur futemi në fushën e llafeve që synojnë vetëm të mjegullojnë çdo gjë, aty është më vështirë”- u shpreh Rama. Versus.al
