Një ngjarje e pazakontë ka ndodhur në Moskë, ku dy adoleshentë kanë gjetur një çantë dore të mbushur me 88.000 dollarë cash, e cila ishte hedhur nga dritarja e një apartamenti.
Sipas mediave ruse, çanta ishte hedhur nga një vajzë vetëm 7 vjeç, gjatë një konflikti në familje. Paratë u gjetën nga dy të rinjtë, të cilët fillimisht vendosën të mbajnë një pjesë të shumës.
Sipas hetimeve dhe raportimit të gazetës Komsomolskaya Pravda, adoleshentët madje kanë djegur rreth 5.000 dollarë, ndërsa pjesën tjetër tentuan ta përdornin.
Në fillim, ata planifikuan t’i kthenin paratë në rubla ruse, ku rreth 83.000 dollarë përkthehen në afërsisht 7.1 milionë rubla, por shpejt kuptuan se nuk mund ta bënin këtë vetë në bankë. Njëri prej tyre i tregoi prindërve për paratë e gjetura, të cilët më pas kontaktuan policinë.
Ndërkohë, autoritetet kishin marrë më herët një kallëzim për humbjen e çantës nga pronari i saj.
Rrezik për pasoja ligjore
Sipas ligjit rus, sendet e gjetura duhet të dorëzohen menjëherë tek autoritetet. Në të kundërt, veprimi konsiderohet shkelje penale dhe mund të dënohet deri në dhjetë vite punë të detyruar.
Mediat raportojnë se prindërit e adoleshentëve mund të detyrohen të kompensojnë shumën e munguar.
Ende nuk dihet pse pronarja e çantës mbante një shumë kaq të madhe parash në valutë të huaj, por për krahasim, kjo shumë mjafton për të blerë një apartament të vogël në rajonin e Moskës. /VERSUS
