Çfarë do të gjeni në brendësi
*Atmosfera në rrugët e Varshavës ka qenë e zjarrtë gjatë gjithë ditës së sotme. Rreth 3 mijë tifozë shqiptarë ndodhen në Poloni për të ndjekur ndeshjen e vlefshme për fazën play off të Botërorit 2026. *Federata polake e futbollit ndërmori vendimin që çatia e stadiumit të Varshavës të ishte e mbyllur duke e bërë atmosferën edhe më të vështirë për kuqezinjtë. *Kombëtarja shqiptare ka dalë në fushë me më të besuarit e Sylvinhos për momentin, duke lënë në stol Armando Brojën.
BE ndryshon mendje për emigracionin, votohet vendimi që i nxjerr emigrantët jashtë vendeve të unionit
Evropa mesa duket po nis të ndryshojë kurs sa i takon emigrantëve të paligjshëm që shfaqen në kampet e azilit në shtete të ndryshme. Së fundmi, Parlamenti Europian mori një vendim që ndryshon qasjen ndaj emigracionit, duke lehtësuar ngritjen e qendrave për mbajtjen e emigrantëve jashtë Bashkimi Europian, të njohura si “return hubs”.
Vendimi u votua me 389 vota pro, 206 kundër dhe 32 abstenime, duke kaluar falë një aleance mes partive të djathta dhe atyre të ekstremit të djathtë, që më parë kishin mbajtur distancë nga njëra-tjetra. Ndërkohë, partitë e majta dhe ato të qendrës votuan kundër.
Me këtë ndryshim, çdo shtet anëtar i BE-së mund të negociojë vetë ose në grupe të vogla për të dërguar emigrantët që u është refuzuar azili jo në vendet e origjinës, por në qendra të posaçme që pritet të ndërtohen jashtë territorit të unionit. Disa vende si Greqia, Gjermania, Holanda, Austria dhe Danimarka kanë nisur tashmë negociata me shtete, kryesisht në Afrikë, për të pritur këto struktura. Versus.al
Ndeshje vendimtare për Botërorin 2026, publikohet formacioni për "betejën" me Poloninë
Në prag të nisjes së ndeshjes së vlefshme për fazën Play Off të Botërorit 2026, është publikuar formacioni zyrtar i skuadrës sonë kombëtare.
Në portë është Tomas Strakosha, në mbrojtje: Gjimshiti, Ajeti, Hysaj, Mitaj, në mesfushë: Shehu, Asllani, Laçi. Ndërsa në sulm Uzuni do jetë në qendër me Bajramin dhe Hoxhën që e mbështesin nga krahët.
Kapiten për këtë ndeshje do jetë Berat Gjimshiti. Ndërsa pritet që atmosfera të jetë tepër e zjarrtë për shkak edhe vendimit të marrë nga federata polake për mbylljen e çatisë së stadiumit.
Para ndeshjes, tifozët shqiptarë u panë duke festuar në Varshavë. Versus.al
Pak orë para ndeshjes Poloni-Shqipëri, ndërtesa në Fier "vishet" me flamurin gjigant
Ndërkohë që kanë mbetur pak orë nga ndeshja Poloni-Shqipëri që luhet sot në Varshavë në orën 20:45, një grup tifozësh kuqezi në Fier, kanë mbuluar me flamurin kombëtar një ndërtesë të madhe në qendër të qytetit.
Flamuri me shqiponjën dykrenare shtrihet pothuajse në të gjithë fasadën e ndërtesës katërkatëshe, duke tërhequr menjëherë vëmendjen e kalimtarëve. Përmasat e tij të mëdha e kanë kthyer godinën në një simbol të dukshëm të mbështetjes dhe entuziazmit për ekipin kombëtar.
Gjesti u mirëprit edhe nga qytetarët, ndërsa atmosfera festive ndihet në qytet. Versus.al
