Kryedemokrati ka reaguar për herë të parë për zgjedhjen e Klodian Brahos në krye të Prokurorisë së Posaçme (SPAK). Berisha tha se ndryshe nga Dumani, Braho është zgjedhur në mënyrë kushtetuese.
Në reagimin e tij nuk kurseu as ironitë për Dumanin për të cilin tha se nuk ka as ligj dhe as kushtetutë. Ndërsa pati kritika për faktin se kandidatja e vetme grua, Doloreza Musabelliu, nuk mori asnjë votë nga 11 anëtarët e KLP.
“Dje u zbatua Kushtetuta. Nuk u zgjodh si i pari me 5 vota, që ishte jo kushtetuese dhe që nuk mund të rrinte asnjë ditë në detyrë. Jo. I dyti mori 7 vota dhe komenti i dytë, aty ishte një zonjë, ç’ka tregon se ajo trupë e KLP-së është mizogenike dhe nuk i dhanë asnjë votë.
Kështu është. Ishte një zonjë aty, ajo nuk shkoi vetë aty. Aty në KLP e dërgoi komisioni i Skapit, shkoi atje dhe dy-tre zonja që ishin në KLP nuk menduan t’i jepnin një votë. E nxorën pa asnjë votë. Këto dy komente kam unë për zgjedhjet e djeshme. U zgjodh në përputhje me Kushtetutën, në dallim të madh nga pararendësi i tij, që nuk ka kushtetutë as ligj, por këtu u zbatua kushtetuta.
Kishin bërë rregulloren vetë për votim të hapur, gjersa kanë rënë dakord, në ujdi. Normal në institucione votimi është i mbyllur, por ata kanë rënë dakord vetë dhe nuk mund të ua diskutojë kush të drejtën për të vendosur si të votojnë”- tha Berisha. Versus.al
