Drejtuesi politik i PD për Tiranën, Belind Këlliçi, në kanalet e tij të komunikimit ka kërkuar ndërhyrjen e Task Forcës së SPAK për të hetuar krimet zgjedhore që, sipas tij, po ndodhin në administratën shtetërore.
Në postimin e publikuar Këlliçi ka denoncuar titullaren e Agjencisë së Pasurive të Sekuestruara, Risena Xhaja e cila në bashkëpunim me Aurel Boriçin po tentojnë ta kthejnë këtë institucion në një shtab elektoral të Fatmir dhe Etjen Xhafës.
Më tej Këlliçi i bën thirrje SPAK të veprojë menjëherë sot pasi nesër do të jetë vonë.
Postimi i plotë:
Thirrje publike drejtuar TASK FORCËS së SPAK për krimet zgjedhore!
Një punonjës i ndershëm i Agjencisë së Pasurive të Sekuestruara, informon se titullarja e institucionit Risena Xhaja, në bashkëpunim me Aurel Boriçin, këshilltarin besnik të Erion Veliajt, po tentojnë ta kthejnë këtë institucion në një shtab elektoral të Fatmir dhe Etjen Xhafës!
Fakti i mësipërm është lehtësisht i verifikueshëm, nëse SPAK ka vullnetin apo dëshirën të sekuestrojë pamjet filmike apo telefonat e këtyre shtetasve.
Në 3 ditët e fundit, kemi konstatuar dhe denoncuar përsëritjen e të njëjtës skemë të patronazhimit, blerjes së votës dhe shantazhimit me vendin e punës të Administratës Publike nga partia shtet!
Ndaj SPAK duhet të veprojë menjëherë sot, pasi nesër do të jetë shumë vonë!
Garantojmë punonjësit e ndershëm të Administratës Publike, se për ne ata janë aset kombëtar dhe të tillë do të mbeten edhe pas fitores së PD më 11 Maj.
Prandaj duhet që ditën e dielë, ti drejtohen të lirë dhe të vendosur kutive të votimit, për ta bërë realitet sëbashku ndryshimin e madh që presin të gjithë shqiptarët.
Votoni për veten, për familjet dhe për fëmijët tuaj./Versus.al
