Kryedemokrati Sali Berisha gjatë një konference për mediat ditën e sotme ka përsëritur deklaratat e tij duke thënë se rruga e vetme për rrëzimin e qeverisë së drejtuar nga Edi Rama janë protestat e qëndrueshme.
Sipas tij, misioni i rrëzimit të Ramës do të jetë vetëm pasi mijëra persona të dalin në rrugë për të protestuar dhe të shkëputen nga lodhja apo zhgënjimi që i ka kapluar.
“Opozita do të fillojë protesta pa asnjë diskutim. Opozita po bën gjithçka për të qartësuar tek çdo qytetar se, rruga e vetme është protesta e qëndrueshme. Se është koha, sot më shumë se kurrë të vendosi për të marrë përsipër misionin tonë të ri.
Misionin e përmbysjes së regjimit të narkoshtetit. Mision i cili do të përmbushet sapo mijëra shqiptarë të vendosin të dalin në shesh çdo ditë. Të protestojnë kundër regjimit. Të ndahen nga apatia, lodhja, mërzitja, zhgënjimi që i ka pushtuar. Bulevardi është sheshi, është rruga e fitores.
Asnjë prej tyre nuk duhet t'i thotë vetes se sa jemi. Idealet nuk maten me numra, forca e idealeve nuk maten nga numrat, por nga guximi dhe guximi i idealistëve është i pashtershëm dhe triumfues. Dhe unë kam besim të madh se kjo karabina e kalbur që po kundërmon erën më të keqe në Shqipëri dhe mbarë Europën, do të marrë vendin që meriton”- u shpreh Berisha mes të tjerash. Versus.al
