Sot u publikuan detaje nga projektbuxheti të cilin qeveria e ka dorëzuar në Kuvend për diskutim e më pas për votim. Në këtë projektbuxhet vihet re se shuma më e madhe e fondeve është caktuar për ministrinë e Shëndetësisë me 820 milionë euro dhe rritje prej 20 milionë eurosh. E njëjta rritje vihet re edhe për ministrinë e Infrastrukturës dhe Energjisë e cila për këtë vit që vjen d otë ketë buxhet total prej 770 milionë eurosh.
Rritjen më të madhe të buxhetit e ka ministria e Mbrojtjes me 102 milionë euro më shumë sesa vitin që po lëmë pas. Në 2026-ën, industria e mbrojtjes do të ketë për buxhet shumën prej 589 milionë eurosh. Rritja është bërë për shkak të detyrimeve të forta që duhen përmbushur në kuadër të NATO-s si dhe modernizimin e kapaciteteve dhe infrastrukturës së Forcave të Armatosura.
Ndërkaq ministrisë së Ekonomisë i janë zbritur 60 milionë euro krahasuar me vitin e kaluar.
Më pak lekë janë caktuar edhe për presidencën me totalin e 5.9 milionë eurove, nga 6 që kishte vitin 2025. Edhe për Kuvendin është ulur buxheti me 1 milionë euro më pak.
Kryeministrisë i rritet buxheti me 3.4 milionë euro (Merr 12.5 milionë euro, nga 9 në 2025-n) Gjithsej institucionet do të marrin rreth 5 miliard euro nga 4.7 që kishin këtë vit që po mbyllet.
Sa u takon institucioneve të drejtësisë vihet re një rritje e ndjeshme për ta në kuadër edhe të nevojës për ndërtimin e ambienteve të reja të gjykatave në vend.
Buxheti për disa prej ministrive:
Ministria e Shëndetësisë 820 mln euro
Ministria e Infrastrukturës 770 mln euro
Ministria e Arsimit 648 mln euro
Ministria e Bujqësisë 162 mln euro
Ministria e Ekonomisë 417 mln euro
Ministria e Brendshme 357 mln euro
Buxheti për institucionet e drejtësisë:
KLGJ 68 mln euro
P. Përgjithshme 34 mln euro
SPAK 21 mln euro
KLP 2.2 mln euro. Versus.al
