Kryeministri Edi Rama mbrëmë vonë ka reaguar me një video të publikuar në rrjetet sociale duke kërkuar ndjesë për përdorimin e termit “autik” për të ironizuar ata që votojnë për opozitën.
Teksa e konsideroi njerëzore që të gabojë, Rama tha se tashmë e ka mësuar se pavarësisht se e përdori duke thënë “politikisht autik”, ky term është i papërshtatshëm.
"Nuk mund të mos e ndaja dot këtë reflektim. Të gabosh është njerëzore, ndërsa të mos kërkosh ndjesë nuk është burrërore. Krejt pa dashje sot kam cënuar fëmijët autikë dhe me siguri kam lënduar prindërit e tyre duke folur për autizëm politik, shprehje që më ka mbetur diku në mendje se është përdorur edhe në literaturën politike, akademike dhe më doli sot krejt padashje. Por, ja u desh të gaboja dhe pastaj të mësoja, se vitesh konsiderohet e papërshtatshme dhe në fakt me plot të drejtë”- shprehet ai.
Ndërsa thotë se ky gabim e nxit që të shtojë më shumë mbështetjen nga qeveria për fëmijët e spektrit autik, nuk harroi t’u përgjigjej edhe reagimeve të shumta nga opozita për këto cilësime të tij.
“Prandaj kërkoj ndjesë dhe u garantoj se kam jo vetëm respekt, por edhe admirim për ta dhe për prindërit e fëmijëve me aftësi të veçanta që më ka shtyrë që të nxis dyfishimin e mbështetjes së tyre nga qeveria. Që e kam thënë në më shumë se një rast do jetë pjesë e projektbuxhetit të 2026, ndërsa lehaqenieve që u kapën pas fëmijëve autik si i mbyturi pas fijes së barit për të përfituar pikë në sy të atyre prindërve të nderuar, u jap fjalën se kjo do të jetë një motiv më shumë që ta shpenzoj çdo energji timen që t’i japim mësimin e merituar më 11 maj për të gjitha prapësit e tyre të pamerituara në kurriz të këtij populli dhe këtij vendi”- përfundon kreu i qeverisë në videon e publikuar. Versus.al
