Pas denoncimit të bërë nga Partia Demokratike për “trenin bullgar” me fleta votimi të gjetura në një lokal të fshatit Pekisht, policia ka shkuar në vendngjarje, ku ka sekuestruar 10 fletë votimi të falsifikuara dhe armë zjarri.
Fletët e votimit u gjetën brenda lokalit në pronësi të D.B i cili u vu nën hetim për veprat penale "falsifikimi i materialit zgjedhor dhe rezultatit të zgjedhjeve" si dhe "prodhimi dhe mbajtja pa leje e armëve të gjuetisë dhe sportive".
"Specialistët për Hetimin e Krimeve të Komisariatit të Policisë Peqin, pas njoftimit të marrë më datë 22.05.2025, se në një lokal në fshatin Pekisht, ishin gjetur disa materiale të dyshuara zgjedhore, kanë shkuar menjëherë në adresën e dhënë, me qëllim verifikimin e rastit.
Gjatë veprimeve të kryera në vendngjarje, në bashkëpunim me Prokurorinë e Elbasanit, në lokalin e shtetasit D. B., janë gjetur dhe sekuestruar 10 fletë të ngjashme me fletët e votimit, të paplotësuara, të dyshuara të falsifikuara, si dhe një listë emërore e zgjedhësve.
Gjithashtu, është sekuestruar portofoli i shtetasit D. B., me 280 000 lekë.
Më tej, gjatë kontrollit në banesën e shtetasit D. B., janë gjetur një pushkë e vjetër trofe dhe një pistoletë zhurmuese (sportive). Në vijim të veprimeve për rastin, specialistët për Hetimin e Krimeve të Komisariatit të Policisë Peqin referuan materialet procedurale në Prokurori, ku nisi procedimi penal për shtetasin D. B., për veprat penale “Falsifikimi i materialit zgjedhor dhe rezultateve të zgjedhjeve” dhe “Prodhimi dhe mbajtja pa leje e armëve të gjuetisë dhe sportive”"- njofton policia.
Nga ana tjetër PD dy ditë më parë e denoncoi ngjarjen si diçka të përsëritur gjatë zgjedhjeve dhe pretendoi për manipulim të rezultatit nëpërmjet futjes së fletëve të plotësuara në kutitë e votimit. Versus.al
