Policia ka sekuestruar pistoletën tip “Beretta” të cilën Daniel Pepa përdori për të vrarë Flori Paluçin në Manzë të Durrësit.
Ngjarja ndodhi rreth orës 01:45 të natës (22 tetor), një konflikt i nisur për një kafe në një lokal në Manëz përfundoi tragjikisht me dy të vrarë. Debati filloi pasi kamerieri i lokalit, 23-vjeçari Aranit Kurti, i tha klientit Daniel Pepa se ekspresi ishte i fikur dhe nuk mund të përgatiste kafe.
Përplasja verbale me fjalë u agravua pas ndërhyrjes së 33-vjeçarit Flori Paluçi në mbrojtje të kamarierit.
Tre të rinjtë dolën në oborrin e lokalit, ku sipas hetimeve paraprake Paluçi qëlloi i pari dhe vrau kamerierin Kurtin. Më pas, Daniel Pepa mori armën dhe vrau Paluçin.
Pepa u shpall në kërkim, ndërsa disa persona u shoqëruan për të zbardhur të plotë dinamikën e ngjarjes.
Njoftimi i policisë:
Durrës
Specialistët për Krimin Kundër Jetës dhe Pronës në Drejtorinë Vendore të Policisë Durrës arrestuan shtetasin D. P., 21 vjeç, banues në fshatin Manëz, Njësia Manëz, Durrës.
Arrestimi i tij u krye në zbatim të urdhrit të datës 14.11.2025, të Prokurorisë pranë Gjykatës së Shkallës së Parë të Juridiksionit të Përgjithshëm Durrës, për ekzekutimin e vendimit penal nr. 622/1, datë 13.11.2025, të Gjykatës së Shkallës së Parë të Juridiksionit të Përgjithshëm Durrës, e cila ka caktuar masën e sigurimit “Arrest në burg” ndaj këtij shtetasi, si person i dyshuar për kryerjen e veprave penale “Vrasja me dashje”, “Mbajtja pa leje dhe prodhimi i armëve, i armëve shpërthyese dhe municioneve”.
Këto veprime lidhen me ngjarjen e ndodhur më datë 22.10.2025, ku janë vrarë shtetasit F. P. dhe A. K., në Manëz, Durrës, ngjarje në të cilën ky shtetas rezulton i implikuar, i dyshuar si autor.
Gjatë veprimeve procedurale, këtij shtetasi i është sekuestruar një armë zjarri.
Në bashkëpunim me Prokurorinë vijon puna për dokumentimin e plotë ligjor të ngjarjes.
