Partia Socialiste ka publikuar draftin e saj për ndryshimet në Rregulloren e Kuvendit të Shqipërisë, ku parashikohen masa të reja për procedurat parlamentare dhe organizimin e punës së deputetëve dhe ministrave.
Sipas dokumentit, koha e fjalimeve të ministrave dhe deputetëve në seancat plenare do të kufizohet në 5 minuta, ndërsa numri i komisioneve parlamentare të përhershme mbetet 11, duke ruajtur fushat e tyre të përgjegjësisë.
Ndryshimet kryesore të propozuara përfshijnë:
Procedurë të përshpejtuar për shqyrtimin e projektligjeve që lidhen me përafrimin e legjislacionit shqiptar me atë të Bashkimit Evropian, si dhe për marrëveshjet e Stabilizim-Asociimit.
Përditësimin e pikave që përcaktojnë afatet e fjalimeve në nenet 47 dhe 48, duke ulur kohën nga 10 në 5 minuta.
Organizimin e seancave dëgjimore publike nga komisionet për mbikëqyrjen institucionale dhe raportimin e zbatimit të ligjeve të miratuara.
Përmirësimin e procedurave për shqyrtimin e nismave qytetare dhe peticioneve, duke përcaktuar afate dhe mënyra të qarta të trajtimit.
Shtimin e rregullave për zgjedhjen e kandidatëve në organet kushtetuese ose të krijuara me ligj, me propozim të institucioneve ose grupit të deputetëve, duke vendosur afate për paraqitjen e kandidaturave, dëgjimet publike dhe votimin në Kuvend.
Ndryshime në procedurat për kërkesat e shkarkimit të anëtarëve të organeve kushtetuese, duke përcaktuar se kërkesa duhet të nënshkruhet nga të paktën 28 deputetë dhe të dorëzohet në mënyrë të motivuar.
Drafti, i dërguar kryetarit të Kuvendit Niko Peleshi, synon përmirësimin e efikasitetit të punës parlamentare, rritjen e transparencës dhe zbatimin më të shpejtë të ligjeve dhe iniciativave qytetare.
Ndër ndryshimet më të rëndësishme është gjithashtu edhe përcaktimi i mekanizmave të monitorimit periodik dhe vjetor të institucioneve, si dhe procedurat për raportimin e tyre në Kuvend për efektivitetin e ligjeve të miratuara.
Drafti pritet të diskutohet së shpejti në seancat e komisioneve dhe më pas në Kuvend për miratim./Versus.al
