Një 22-vjeçar, Justino Kurti, është arrestuar nga policia në Vlorë pasi u kap në flagrancë duke shitur doza kokainë në Dhërmi. Gjatë kontrollit, ai u gjet me disa doza të drogës dhe një pistoletë sportive me silenciator, e cila ishte e pajisur me municionin përkatës.
Specialistët e Seksionit për Hetimin e Narkotikëve të Drejtorisë Vendore të Policisë Vlorë, bazuar në informacionet operative, ndaluan automjetin e 22-vjeçarit në fshatin Dhërmi. Kontrolli fizik dhe ai në automjet evidentuan veprimtarinë kriminale të tij.
Në përfundim të veprimeve, Kurti u arrestua për veprat penale:
“Prodhimi dhe mbajtja pa leje e armëve të gjuetisë dhe sportive”
“Prodhimi dhe shitja e narkotikëve”
Materialet procedurale janë dërguar në Prokurorinë pranë Gjykatës së Shkallës së Parë të Juridiksionit të Përgjithshëm Vlorë për veprime të mëtejshme.
Njoftimi i policisë:
Shiste doza Kokaine në Dhërmi, kapet në flagrancë me disa doza dhe me pistoletë sportive, në automjet, vihet në pranga 22-vjeçari.
Sekuestrohen dozat e Kokainës, gati për shitje, dhe pistoleta sportive me silenciator.
Specialistët e Seksionit për Hetimin e Narkotikëve të Drejtorisë Vendore të Policisë Vlorë, në vijim të punës për goditjen e rasteve të shitjes së lëndëve narkotike, në doza, bazuar në informacionet e siguruara në rrugë operative, kanë goditur një tjetër rast të kësaj veprimtarie kriminale.
Shërbimet e Policisë ndaluan në fshatin Dhërmi, automjetin me drejtues shtetasin J. K.
Gjatë kontrollit fizik, shtetasit J. K. iu gjetën disa doza Kokaine, ndërsa gjatë kontrollit në automjet, u gjet një pistoletë sportive, me municionin përkatës dhe me silenciator.
Në përfundim të veprimeve procedurale, shtetasi J. K., 22 vjeç, banues në Dhërmi, u arrestua në flagrancë për veprat penale “Prodhimi dhe mbajtja pa leje e armëve të gjuetisë dhe sportive” dhe “Prodhimi dhe shitja e narkotikëve”.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Vlorë, për veprime të mëtejshme./Versus.al
