Një aksident tragjik rrugor në Afganistan ka marrë jetën e të paktën 20 personave, mes tyre 12 fëmijë, pasi një kamion që transportonte familje afgane të kthyer nga Pakistani u përmbys në provincën lindore të Laghmanit.
Lajmi u konfirmua për AFP nga zëdhënësi i guvernatorit provincial, Abdul Malik Niazai, i cili tha se automjeti po transportonte familje afgane që po ktheheshin në vendlindje pas qëndrimit në Pakistan.
Aksidenti ndodhi në një kryqëzim që lidhet me autostradën kryesore mes qytetit të Jalalabadit dhe kryeqytetit Kabul. Sipas bilancit më të fundit, viktimat përfshijnë pesë gra, tre burra dhe 12 fëmijë.
Fillimisht autoritetet raportuan 18 viktima, por numri u rrit më vonë në 20, ndërsa ekipet e emergjencës vazhduan operacionet në vendngjarje.
Përveç viktimave, të paktën 33 persona të tjerë mbetën të plagosur. Të lënduarit u transportuan në spitalet e zonës, ku sipas dëshmitarëve ndodhen fëmijë, gra dhe burra të moshave të ndryshme që po marrin trajtim mjekësor.
Një gazetar i AFP-së që vizitoi spitalin e Jalalabadit raportoi se repartet ishin mbushur me të mbijetuar të aksidentit, shumë prej tyre me plagë të rënda.
Ngjarja ka tronditur vendin në ditën e fundit të festës së Kurban Bajramit. Zëdhënësi i qeverisë talebane, Zabihullah Mujahid, deklaroi se ishte “thellësisht i pikëlluar” nga tragjedia dhe shprehu ngushëllimet për familjet e viktimave.
“Lutemi që të plagosurit të shërohen sa më shpejt”, shkroi ai në rrjetin social X.
Aksidentet rrugore janë një problem i vazhdueshëm në Afganistan, ku infrastruktura e dëmtuar, rrugët e amortizuara dhe mungesa e masave të sigurisë kontribuojnë shpesh në tragjedi me pasoja të rënda njerëzore.
