Sipas një raporti të fundit të Financial Times, Gjermania dhe Italia renditen menjëherë pas Shteteve të Bashkuara për nga sasia e rezervave të arit që zotërojnë, me 3.352 ton në pronësi të Gjermanisë dhe 2.452 ton në pronësi të Italisë, sipas të dhënave të Këshillit Botëror të Arit.
Megjithatë, një pjesë e konsiderueshme e këtij thesari nuk ndodhet në territorin evropian. Shumica e arit gjerman dhe italian ruhet në Rezervën Federale të Nju Jorkut, në qendër të Manhattanit – një praktikë që daton që nga Lufta e Ftohtë, kur ekzistonte frika e një pushtimi sovjetik dhe një besim i palëkundur në sistemin financiar amerikan.
Aktualisht:
37% e arit të Gjermanisë ndodhet në SHBA,
43% e arit të Italisë ndodhet në SHBA.
Frika nga Trump dhe trazirat globale
Me rritjen e pasigurisë gjeopolitike, nga luftërat në kufijtë lindorë të Europës e deri te tensionet në Gjirin Persik dhe politikat e paparashikueshme të ish-presidentit amerikan Donald Trump, zyrtarët evropianë po bëjnë thirrje për kthimin e rezervave në atdhe.
“Na shqetëson shumë mundësia që Trump të ndikojë mbi pavarësinë e Rezervës Federale,” deklaroi Michael Jäger, president i TAE (Taxpayers Association of Europe). Ai shton se kthimi i arit është mënyra më e sigurt për të ruajtur kontrollin kombëtar mbi stabilitetin ekonomik.
Misteret e arit të zhdukur: Nga nazistët te Mussolini
Kjo nismë ka risjellë në vëmendje edhe enigma historike të arit evropian:
Dokumente të deklasifikuara zbulojnë se 154 ton ar nazist kaluan nga Zvicra përmes Canfranc, drejt Spanjës dhe Portugalisë, përpara se pjesë e këtij ari të përfundonte në SHBA në kuadër të Planit Marshall.
Ndërkohë, mbetet i pazgjidhur edhe misteri i të ashtuquajturit “ari i Dongo-s”, një thesar i Benito Mussolinit që përfshinte lingota, bizhuteri dhe valutë, kapur nga partizanët në 1945, por i cili u zhduk në rrethana të paqarta, duke ushqyer teori për vjedhje apo përdorim të fshehtë nga autoritete të ndryshme.
Në këtë kontekst, Gjermania dhe Italia po përqendrohen gjithnjë e më shumë në garantimin e rezervave monetare brenda kufijve kombëtarë, si masë mbrojtëse ndaj krizave të mundshme financiare në të ardhmen. /Versus.al
