Komisioneri i Agjencisë Amerikane për Ushqimin dhe Barnat (FDA), Martin Makary, ka deklaruar se të dhënat e mbledhura gjatë qeverisjes së presidentit Joe Biden tregojnë se 10 fëmijë mund të kenë humbur jetën për shkak të vaksinës kundër COVID-19. Ai bëri këtë deklaratë gjatë një interviste për Fox News.
Sipas raportimeve të mëparshme nga New York Times, një memo i brendshëm i FDA-së ka evidentuar se të paktën 10 fëmijë mund të kenë vdekur pas vaksinimit, duke përmendur si shkaqe të mundshme miokarditin ose inflamacionin e zemrës.
Makari theksoi se vaksinat e lansuara në vitin 2020 kanë qenë të dobishme për personat në rrezik dhe të moshuarit, por përdorimi i tyre i rregullt tek të rinjtë nuk bazohet gjithmonë në të dhëna shkencore.
Memoja e përgatitur nga këshilltari kryesor mjekësor dhe shkencor i FDA-së, Vinay Prasad, nuk specifikonte moshën e fëmijëve, gjendjen e tyre shëndetësore, apo prodhuesin e vaksinës. Prasad e quajti gjetjen “thelbësore” dhe njoftoi se do të forcohet mbikëqyrja e vaksinave, duke përfshirë kërkesën për studime të rastësishme për të gjitha nën-grupet.
Ndërkohë, Komiteti i Vaksinave i Qendrave për Kontrollin dhe Parandalimin e Sëmundjeve (CDC) pritet të mblidhet javën e ardhshme për të shqyrtuar këto raste./Versus.al
