Kremlini ka ftohur pritshmëritë e Donald Trump për një zgjatje të armëpushimit mes Rusisë dhe Ukrainës, duke deklaruar se vendimi nuk varet vetëm nga presidenti amerikan.
Këshilltari presidencial rus, Yuri Ushakov, tha se shpresa e Trump për të zgjatur armëpushimin përtej datës 11 maj është “e pabazë”.
“Por ai shpreson për këtë dhe pse jo? Po punon për ta arritur”, deklaroi Ushakov, i cituar nga agjencia ruse Tass.
Megjithatë, ai theksoi se vazhdimi i armëpushimit “nuk varet vetëm prej tij, por edhe nga dy palët e tjera”, duke iu referuar Rusisë dhe Ukrainës.
Sipas Ushakov, marrëveshja për armëpushimin nga 9 deri më 11 maj, e shpallur një ditë më parë nga Trump, u arrit pas dy ditësh diskutimesh telefonike intensive mes përfaqësuesve të administratës ruse dhe asaj amerikane.
Deklaratat e Kremlinit tregojnë se, pavarësisht kontakteve diplomatike mes Moskës dhe Uashingtonit, mbeten ende pengesa të mëdha për një marrëveshje më afatgjatë në konfliktin që vijon prej më shumë se katër vitesh.
