Ishte maji i vitit 2003, një ditë me shi në Londër, kur dy burra të veshur si klientë hynë në dyqanin luksoz të bizhuterive Graff.
Brenda pak sekondash, njëri prej tyre nxori armën dhe urdhëroi punonjësit e klientët të shtriheshin përtokë. Në më pak se një minutë, grabitësit u larguan qetësisht me bizhuteri me vlerë 20 milionë euro. Ishte hera e parë dhe e vetme që një anëtar i bandës famëkeqe “Pink Panthers” u kap në flagrancë.
Që nga ajo ditë, emri i tyre u kthye në mit. Sipas mediave ndërkombëtare dhe Interpolit, “Pink Panthers” (Panterat rozë) janë përgjegjës për të paktën 350 grabitje në mbarë botën gjatë rreth 30 viteve, me një bilanc që vlerësohet nga 350 deri në 500 milionë euro.
Banda, e përbërë nga rreth 500 anëtarë, besohet se ka rrënjë kryesisht në Serbi, Kroaci dhe Mal të Zi, me shumë prej tyre ish-ushtarakë apo pjesëtarë të forcave speciale.
Goditjet e tyre janë përshkruar si kinematografike: nga grabitja e bujshme në Dubai më 2007, ku dy makina Audi u futën brenda një qendre tregtare duke thyer xhamat, te grabitjet në Londër, Tokio, Paris, Kanë, Sen Tropez dhe Singapor.
Në Japoni, në vitin 2004, realizuan grabitjen më të madhe të bizhuterive në historinë e vendit, duke marrë një varëse me 116 diamante.
Edhe Greqia ka qenë në shënjestër të tyre. Sulmet nisën në vitin 2007 në Santorini dhe vijuan në Kos, Rodos, Pire, Kavuri dhe Glyfada.
Së fundmi, në shtator të vitit të kaluar, një grabitje në Halkidiki ringjalli dyshimet për rikthimin e tyre, ndërsa në Athinë, grabitja e butikës Rolex në 2022 solli krahasime me “Pink Panthers”, edhe pse autorët u cilësuan më pak profesionistë.
Autoritetet theksojnë se banda nuk funksionon si një organizatë klasike me hierarki, por si rrjet qelizash të pavarura, çka e bën jashtëzakonisht të vështirë çmontimin e saj. Edhe pse disa anëtarë janë arrestuar ndër vite, shumica e grabitjeve mbeten pa autorë dhe pa rikuperim të sendeve të vjedhura.
Siç ka thënë anonimisht një anëtar i bandës për mediat ndërkombëtare:
“Na pëlqen të grabisim të pasurit, kur nuk e presin dhe as nuk e imagjinojnë.”
Pas tri dekadash, miti i “Pink Panthers” mbetet gjallë, mes frikës së autoriteteve dhe admirim-it të fshehtë për precizionin dhe guximin e grabitjeve të tyre.Marrë nga Prothema-Versus.al
