Më 21 korrik, Papa Leoni zhvilloi një bisedë telefonike me Presidentin e Autoritetit Palestinez, Mahmud Abbas, në lidhje me situatën e rënduar humanitare në Gazë dhe dhunën në Bregun Perëndimor të pushtuar.
Kjo ishte biseda e parë zyrtare mes dy liderëve që prej zgjedhjes së Papa Leonit në krye të Kishës Katolike.
Sipas deklaratës zyrtare të Vatikanit, Ati i Shenjtë përsëriti thirrjen e tij për respektimin e plotë të ligjit humanitar ndërkombëtar, duke theksuar rëndësinë e:
Mbrojtjes së civilëve dhe vendeve të shenjta,
Ndalimit të përdorimit disproporcional të forcës, dhe
Kundërshtimit të zhvendosjes së detyruar të popullsisë.
Papa Leoni shprehu gjithashtu nevojën urgjente për ndihmë humanitare, sidomos për të prekurit dhe më të cenueshmit nga konflikti.
Kjo bisedë vjen vetëm pak ditë pas një sulmi ajror izraelit që goditi kishën e vetme katolike në Gazë, ku humbën jetën tre persona. Pas sulmit, Papa zhvilloi një bisedë edhe me kryeministrin izraelit Benjamin Netanyahu, duke shprehur shqetësimin për situatën. /Versus.al
