Në brendësi të Unazës së Peshkatarit, që Papa Leoni XIV mori gjatë ceremonisë së inaugurimit, mbishkrimi është i qartë: Leoni XIV. Ndërsa jashtë saj, figura e Shën Pjetrit me çelësat dhe rrjetën, e vendos këtë unazë si një simbol të fuqishëm të papnisë. Imazhi, i publikuar nga Zyra e Kremtimeve Liturgjike të Papës, shoqërohet me një shpjegim që e zbërthen më thellë kuptimin e saj.
Unaza e Peshkatarit iu dorëzua Papës Leoni XIV gjatë kremtimit të 18 majit. Duket qartë se kjo unazë është e lidhur ngushtë me figurën e Shën Pjetrit, për shkak të emrit që mban – "e Peshkatarit". Pjetri, ky Apostull që në fillim ishte një peshkatar, me besimin e thellë që kishte në fjalën e Jezusit, nxori nga deti rrjetat e peshkimit të mrekullueshëm. Kjo ngjarje simbolizon besimin dhe thirrjen për të shpallur Fjalën e Perëndisë.
Por kjo unazë ka më shumë se kaq. Ajo ka një vlerë të thellë shpirtërore, pasi vepron si një vulë që vërteton detyrën e shenjtë që Jezusi i besoi Shën Pjetrit – "Forcoji vëllezërit e tu në besim". Ky mesazh, i përcjellë përmes unazës, nuk është vetëm një kujtesë për Papën Leoni XIV, por edhe për çdo pasardhës të Pjetrit, për rëndësinë e ruajtjes dhe përhapjes së besimit.
Një tjetër element simbolik i rëndësishëm ka qenë edhe Palliumi.
Ky është një simbol që bashkë me Unazën e Peshkatarit përfaqëson stemën ipeshkvore të Pjetrine. Palliumi është një fashë e ngushtë prej leshi të bardhë, që mbështetet mbi shpatullat e kazulës, dhe ka një domethënie të fuqishme. Është simbol i Bariut të Mirë, që mban përgjegjësinë për udhëheqjen e grigjës, dhe njëkohësisht i Qengjit të Kryqëzuar – figura që përfaqëson shpëtimin e njerëzimit. Ky simbol është zbukuruar me gjashtë kryqe mëndafshi të zinj dhe tri gjilpëra që përkujtojnë gozhdët e Kryqit të Krishtit.
Palliumi dhe Unaza e Peshkatarit nuk janë thjesht elemente dekorative, por janë shenja të forta të besimit dhe misionit të Papës. Ato bartin një ngarkesë shpirtërore dhe simbolizojnë lidhjen e thellë mes Papës dhe traditës të lashtë të Kishës Katolike. Pjesë të rëndësishme të papnisë, ato tregojnë se çdo detaj ka një histori, një mesazh, dhe një thirrje për të pasur besim dhe guxim në përhapjen e Fjalës së Perëndisë.
