Të paktën pesë persona humbën jetën dhe disa të tjerë mbetën të plagosur gjatë një vale bombardimesh ruse që goditën Ukrainën gjatë natës mes së shtunës dhe së dielës. Rajoni i kryeqytetit Kiev ishte ndër më të goditurit, ku për herë të parë, godina e selisë së qeverisë ukrainase është dëmtuar rëndë nga një sulm ajror.
Kryeministrja Ioulia Svyrydenko konfirmoi përmes një postimi në Telegram se "çatia dhe katet e sipërme të godinës së qeverisë janë dëmtuar nga një sulm armik", duke shpërndarë gjithashtu pamje ku shihen flakë duke përfshirë fasadën e ndërtesës, e cila ndodhet pranë Presidencës dhe Parlamentit. Një gazetar i AFP-së në vendngjarje raportoi tym që ngrihej nga ndërtesa, ndërsa helikopterë tentonin të shuanin zjarrin nga ajri.
Sulmi shkatërrues në Kiev
Kryeqyteti u përball me një sulm masiv me dronë dhe raketa, ku humbën jetën të paktën dy persona dhe 18 të tjerë u plagosën, sipas shërbimeve të emergjencës. Ndër viktimat është edhe një vajzë vetëm një vjeçare. Sulmet dëmtuan gjithashtu disa ndërtesa banimi në qytet.
“Bota duhet të reagojë ndaj kësaj shkatërrimi, jo vetëm me fjalë, por me veprime. Duhet të shtojmë presionin me sanksione, sidomos mbi naftën dhe gazin rus”, deklaroi Kryeministrja Svyrydenko, duke kërkuar gjithashtu më shumë armë për mbrojtjen e vendit.
Në fund të muajit gusht, një tjetër valë sulmesh me dronë dhe raketa në Kiev kishte shkaktuar mbi 25 viktima dhe kishte dëmtuar zyrat e delegacionit të Bashkimit Evropian dhe ato të British Council, por ndërtesat zyrtare kishin mbetur kryesisht të paprekura deri tani.
Goditje edhe në rajone të tjera
Sulme ajrore janë raportuar gjithashtu gjatë natës në disa rajone të tjera të vendit. Në rajonin e Dnipropetrovskut, një burrë 54-vjeçar humbi jetën dhe disa infrastrukturë u dëmtuan si pasojë e një sulmi të kombinuar me dronë dhe raketa, sipas guvernatorit ushtarak Serguiï Lyssak.
Ndërkohë, autoritetet në rajonin e Zaporizhzhias (juglindje) raportuan për një grua të vrarë nga bomba ajrore të drejtuara, ndërsa në rajonin kufitar të Sumi-t (verilindje), një tjetër person humbi jetën mbrëmjen e së shtunës.
Aktualisht, forcat ruse mbajnë të pushtuara rreth 20% të territorit ukrainas.
