Personi që vrau ish-kryeministrin e Japonisë, Shinzo Abe, është dënuar me burgim të përjetshëm, tre vjet e gjysmë pasi e qëlloi për vdekje në një tubim në qytetin e Narës në vitin 2022.
Tetsuya Yamagami kishte pranuar fajësinë për vrasje në hapjen e gjyqit vitin e kaluar, por mënyra se si duhet të dënohet ai ka ndarë opinionin publik në Japoni. Ndërsa shumë e shohin 45-vjeçarin si një vrasës gjakftohtë, disa simpatizojnë edukimin e tij të trazuar.
Prokurorët thanë se Yamagami meritonte burgim të përjetshëm për "aktin e tij të rëndë". Vrasja e Abes tronditi vendin, ku praktikisht nuk ka krime me armë.
Duke kërkuar lehtësim, ekipi mbrojtës i Yamagamit tha se ai ishte viktimë e "abuzimit fetar".
Përkushtimi i nënës së tij ndaj Kishës së Unifikimit e falimentoi familjen dhe Yamagami mbante mëri ndaj Abes pasi kuptoi lidhjet e ish-liderit me kishën kontroverse.
Gati 700 njerëz u rreshtuan jashtë gjykatës së distriktit të Narës të mërkurën për të marrë pjesë në seancën e dënimit.
Vdekja tronditëse e Abe-s ndërsa mbante një fjalim në mes të ditës nxiti hetime mbi Kishën e Unifikimit dhe praktikat e saj të dyshimta, duke përfshirë edhe kërkimin e donacioneve financiarisht shkatërruese nga ithtarët e saj.
Çështja zbuloi gjithashtu lidhje me politikanë nga Partia Liberale Demokratike në pushtet e Japonisë dhe rezultoi në dorëheqjen e disa ministrave të kabinetit. Versus.al
