Kryeministrja japoneze Sanae Takaichi, e njohur si “Zonja e Hekurt” e Japonisë, ka shënuar një fitore dërrmuese në zgjedhjet parlamentare të së dielës, duke i hapur rrugë zbatimit të reformave të thella ekonomike dhe forcimit të politikave të sigurisë përballë kërcënimeve nga Kina.
Takaichi, politikania konservatore dhe gruaja e parë në historinë e Japonisë që udhëheq vendin, është shprehur se frymëzohet nga ish-kryeministrja britanike Margaret Thatcher, e njohur gjithashtu si “Iron Lady”.
Sipas projeksioneve, Partia Liberale Demokratike (LDP) e drejtuar prej saj pritet të sigurojë deri në 328 nga 465 vendet në Dhomën e Ulët të Parlamentit. Vetëm dy orë pas mbylljes së qendrave të votimit, LDP kishte kaluar tashmë pragun e 233 mandateve të nevojshme për shumicë, duke u drejtuar drejt një prej rezultateve më të mira elektorale në historinë e saj.
Në bashkëpunim me partnerin e koalicionit, Partinë e Inovacionit të Japonisë (Ishin), Takaichi ka siguruar një supermazhorancë prej dy të tretash, që i mundëson të kalojë ligje edhe pa miratimin e dhomës së lartë të parlamentit, të cilën nuk e kontrollon.
“Këto zgjedhje përfshinë ndryshime të mëdha politike — veçanërisht në politikat ekonomike dhe fiskale, si dhe forcimin e sigurisë kombëtare,” deklaroi Takaichi në një intervistë televizive, ndërsa rezultatet po publikoheshin.
Ajo shtoi se politikat e saj kanë hasur kundërshtime të forta, por theksoi se mbështetja e publikut është një mandat i qartë për të vepruar.
“Nëse kemi marrë mbështetjen e qytetarëve, atëherë kemi detyrimin të përballemi me këto sfida me gjithë forcën tonë,” u shpreh kryeministrja.
Fitorja e Takaichit pritet të ketë ndikim të madh si në ekonominë japoneze, ashtu edhe në ekuilibrat gjeopolitikë në Azi, duke shkaktuar reagime edhe në tregjet financiare ndërkombëtare.
