Kreu i Partisë Demokratike, Sali Berisha, ka deklaruar se protestat e opozitës nuk do të ndalen dhe se shumë shpejt do të publikohet data e radhës së tubimit.

Në një prononcim pas zhvillimeve të fundit, Berisha theksoi se opozita do të vijojë aksionin e saj politik dhe protestues, duke mos u tërhequr nga qëllimet e saj.

Ai u shpreh se, sipas tij, “kryengritja paqësore” do të vazhdojë me të gjitha format e protestës, me synim atë që e cilësoi si ndryshim të sistemit aktual politik në vend.

Berisha gjithashtu bëri thirrje për bashkimin e forcave opozitare dhe grupeve të tjera të interesit, duke theksuar se vetëm një front i përbashkët mund të sjellë, sipas tij, ndryshimin e kërkuar.

Ai shtoi se protestat e zhvilluara deri tani kanë pasur mbështetje si brenda vendit ashtu edhe ndërkombëtarisht, ndërsa paralajmëroi se aksioni opozitar do të vijojë pa ndërprerje.

Berisha: Shumë shpejt do të caktohet. Nuk tërhiqemi. Kryengritja jonë paqësore nuk tërhiqet. Të gjitha format e protestave do të përdoren. Kjo kryengritje paqësore ka mision përmbysjen e narko-regjimit. Ky është një mision i PD, por edhe i forcave të tjerë opozitare dhe grupeve të tjera të interesit dhe do bëjmë gjithçka të bashkohemi në një front të përbashkët. E shtata apo e teta me radhe e panjohur më parë në Shqipëri, ka mbështetje shqiptare dhe botërore. Versus.al

Gjatë protestës së opozitës në Tiranë, policia ka sekuestruar një sasi të konsiderueshme mjetesh të dyshuara ndezëse, të cilat nuk kanë arritur të përdoren gjatë tubimit.

Sipas burimeve nga terreni, forcat e rendit kanë gjetur dhe bllokuar rreth 30 mjete të ngjashme me molotovë të pashpërthyer, ndërsa ndërhyrja e menjëhershme e policisë ka shmangur përdorimin e tyre në disa pika të protestës.

Raportohet se një pjesë e këtyre mjeteve dyshohej të ishte planifikuar për t’u përdorur pranë godinës së Parlamentit, por policia ka vendosur kordon sigurie dhe ka bllokuar aksesin e protestuesve drejt zonës.

Ndërkohë, vetëm një pjesë e mjeteve piroteknike janë përdorur pranë Kryeministrisë gjatë zhvillimit të protestës, ndërsa pjesa tjetër është sekuestruar në kohë nga forcat e rendit.

Gjithashtu, deri më tani raportohet se mbi 20 persona janë shoqëruar nga policia për verifikime në lidhje me incidentet gjatë protestës.

Deputeti demokrat Klevis Balliu është prekur nga hedhja e gazit gjatë protestës së PD-së.

Pas Luçiano Boçit dhe Aulon Kalasë, drejt spitalit me urgjencë është dërguar edhe Balliu.

Aktivisti Aulon Kalaja është transportuar me barelë më pas me ambulancë drejt spitalit, në gjendje të fikëti.

Fillimisht pas mbylljes së fjalës së Sali Berishës, protestuesit hodhën molotovë dhe fishekzjarrë drejt Kryeministrisë.

Kjo situatë solli ndërhyrjen e policisë me gaz lotsjellës, situatë që dyshohet se solli edhe këtë gjendje të Kalasë, i cili ra në tokë pa ndjenja.

Nga ana tjetër Luçiano Boçi ka pasur vështirësi në frymëmarrje nga gazi lotsjellës, e më pas u dërgua në spital me ambulancë.

Është përshkallëzuar situata gjatë protestës së opozitës në Tiranë, ku përplasjet mes protestuesve dhe forcave të policisë kanë sjellë të lënduar në të dyja palët.

Sipas raportimeve nga terreni, gjatë konfrontimeve pranë zonës së Kuvendit, përveç disa deputetëve të opozitës, është lënduar edhe një efektiv i Policisë së Shtetit. Ai është dërguar me urgjencë në spital pasi ka pësuar dëmtime në kokë dhe djegie gjatë përplasjes.

Situata ka nisur kur protestuesit kanë tentuar të çajnë kordonin policor dhe të afrohen drejt godinës së Kuvendit, çka ka sjellë përplasje fizike me forcat e rendit.

Policia ka ndërhyrë për të ndaluar avancimin e turmës, ndërsa tensionet në zonë kanë vijuar për disa minuta përpara se situata të vihej nën kontroll gradualisht./Versus.al

Është tensionuar sërish situata gjatë protestës së opozitës në Tiranë, ku protestuesit kanë tentuar të zhvendosen drejt godinës së Parlamentit, ndërsa forcat e policisë kanë vendosur kordon sigurie pranë zonës së Xhamisë së Namazgjasë.

Të udhëhequr nga deputeti i Partisë Demokratike Flamur Noka, protestuesit dhe përfaqësues të opozitës janë përplasur me policinë, ndërsa situata është përshkallëzuar me ndërhyrjen e mjeteve të ujit për shpërndarjen e turmës.

Gjatë përplasjes është lënduar deputeti i Partisë Demokratike Klevis Balliu, i cili më pas është dërguar për trajtim mjekësor në urgjencë. Ai u ka bërë thirrje protestuesve që të vijojnë marshimin përpara.

Më herët, janë raportuar të lënduar edhe nënkryetari i PD-së Luçiano Boçi si dhe ish-kandidati për deputet Aulon Kalaja, pas përplasjeve të mëparshme me forcat e rendit.

Situata në zonën e protestës mbetet e tensionuar, ndërsa policia vijon të mbajë nën kontroll perimetrin pranë institucioneve qendrore./Versus.al

Është tensionuar situata në protestën e opozitës në Tiranë menjëherë pas përfundimit të fjalës së ish-kryeministrit Sali Berisha, ku janë raportuar incidente dhe përplasje mes protestuesve dhe forcave të policisë.

Sipas raportimeve, pas përfundimit të tubimit, disa protestues kanë hedhur mjete ndezëse në drejtim të zonës pranë Kryeministrisë, ndërsa policia është kundërpërgjigjur me gaz lotsjellës dhe spraj, duke përshkallëzuar situatën në bulevard.

Si pasojë e përplasjes, janë prekur edhe qytetarë, gazetarë dhe përfaqësues të opozitës në terren. Deputeti Luçiano Boçi ka deklaruar se është ndjerë keq gjatë situatës dhe më pas është dërguar me urgjencë në spital për ndihmë mjekësore.

Boçi ka akuzuar policinë për përdorim të tepruar force dhe ka pretenduar se veprimet e saj kanë qenë të drejtuara edhe ndaj deputetëve dhe mediave, ndërsa situata në terren është shoqëruar edhe me tensione dhe përplasje verbale mes palëve.

Autoritetet nuk kanë dhënë ende një reagim të detajuar lidhur me incidentin, ndërsa protesta është shpërndarë gradualisht pas ndërhyrjes së policisë./Versus.al

Situata para kryeministrisë u tensionua edhe më shumë, kur ish kandidati për deputet, Aulon Kalaja ka shfaqur probleme shëndetësore për shkak të gazit lotsjellës që u hodh në drejtim të protestuesve dhe eksponentëve demokratë.

Aulon Kalaja është parë i shtrirë në tokë dhe në gjendje jo të mirë shëndetësore, ndërsa u transportua me ambulancë e cila ndodhej në afërsi të podiumit./Versus.al

Menjëherë pas përfundimit të fjalës së kreut demokrat Sali Berisha, nisi hedhja e molotovëve dhe fishekzjarreve drejt Kryeministrisë.

Por, ndryshe nga herët e tjera, policia ndërhyri menjëherë duke shoqëruar personat që po i hidhnin këto molotovë.

Gjithashtu, policët hodhën gaz lotsjellës mes turmës, ku nga pamjet dukej edhe Flamur Noka që pati probleme nga gazi lotsjellës. 

Kreu i Partisë Demokratike, Sali Berisha, deklaroi gjatë protestës së opozitës në Tiranë se opozita ka dëshmuar se përfaqëson një alternativë të fortë për të ardhur në pushtet, përmes mobilizimit qytetar në protestat e fundit.

Në fjalën e tij para mbështetësve, Berisha e cilësoi lëvizjen opozitare si një “kryengritje paqësore”, duke theksuar se protesta të tilla nuk janë parë në 35 vitet e fundit në vend. Ai u shpreh se opozita përfaqëson, sipas tij, “shpresën e vetme” për të shpëtuar Shqipërinë nga qeverisja aktuale e kryeministrit Edi Rama.

Berisha solli në vëmendje edhe protestat e mëparshme, ku tha se mijëra qytetarë janë përballur me forcat e rendit për orë të tëra, duke përmendur përdorimin e ujit dhe mjeteve shpërndarëse ndaj protestuesve.

Një pjesë e fjalës së tij u ndal edhe te mungesa e pjesëmarrjes në protestat kundër rritjes së çmimit të naftës. Sipas tij, kjo nuk lidhet me mungesë pakënaqësie, por me frikën që, sipas Berishës, qytetarët kanë nga pushteti.

Ai theksoi se rritja e çmimeve dhe niveli i ulët i pagave mbeten shqetësime madhore për qytetarët, ndërsa opozita, sipas tij, do të vijojë protestat si mjet për të sjellë ndryshim politik në vend.

Berisha: Sot jemi mbledhur jo thjeshtësi opozitë në këmbë dhe kundër diktaturës autokratike me serialin më të fuqishëm të protestave kryengritjes paqësore që Shqipëria ka njohur në 35 vitet te fundit. Sot mblidhemi o vetëm si një alternativë e shkëlqyer, sot mblidhemi në këtë protestë si shpresë e vetme për shpëtimin e Shqipërisë nga narkoshteti i Ramës i bazuar në krim, drogë dhe vjedhjen e shqiptarëve. Ne jemi shpresa e vetme për Shqipërinë. Këtë e provuar seriali i protestave gjigante që ka njohur Shqipëria. Kryengritja jonë më e fuqishme paqësore. Protestë  e kaluar, dhjetëra mijëra qytetarë, u përballën në rrugët e shesheve e Tiranës si të pamposhtur për orë të tëra me regjimin. U përballën me ujin e helmuar, shkopinj e plumba gome për triumfuan. Një protestë e thirrur nga shoqëria civile kundër rritjes së madhe të çmimit të naftës, kur takës grabitqare të Ramës në litrën e naftës. Në orën e thirrur u paraqitën vetëm dhjetëra qytetarë. Absolutisht cdo shqiptarë, pavarësisht nga bindet është prekur nga rritja e çmimit të naftës, a ka pakënaqësi midis shqiptarëve? Po ka dhe të mëdha shumë. Rrogat më të ulëta në rajonin tonë. Opozita e ka ngritur të mënyrë të pritur vitin e fundit dhe që banalistët, kriptoramistët e fshehin nga ju shkakun e asaj proteste, është frika të cilën ka ngulur gjer në palcë të shqiptarëve. Njerëzit nga frika nuk guxuan të dilnin në protestë për të mbrojtur interesat e tyre.Versus.al

Bujar Leskaj

Protestues nga e gjithë Shqipëria janë mbledhur këtë të premte në Bulevardin “Dëshmorët e Kombit” në Tiranë, në pritje të mbërritjes së liderit të opozitës, Sali Berisha.

Mes qytetarëve të pranishëm ka qenë edhe deputeti Bujar Leskaj, i cili është bashkuar me mbështetës nga Vlora për të protestuar kundër qeverisë së Edi Rama dhe për të kërkuar largimin e saj nga pushteti.

I pyetur nga gazetarja e Euronews në lidhje me skenarin e protestës dhe nëse do të ndiqte të njëjtën rrjedhë si protestat e mëparshme, Leskaj u shpreh se nuk është pjesë e organizatorëve dhe nuk ka dijeni për detajet e organizimit.

Në deklaratën e tij, deputeti theksoi se qytetarët e Vlorës janë të vetëdijshëm për, sipas tij, abuzimet e kryera nga qeveria në këtë qark.

Ai shtoi se protestat mbeten një mjet demokratik për të kërkuar ndryshim.

“Në Vlorë njëherë Edi Rama ka bërë grabitjet e tij më të mëdha dhe qytetarët e Vlorës janë të mençur dhe e kuptojnë kush është Rama. Jemi të vendosur që ti përdorim të gjitha mjetet demokratike”, tha Leskaj, ndërkohë që theksojmë se në zgjedhjet e majit, Partia Socialiste arriti që të merrte në qarkun e Vlorës plot 9 mandate./Versus.al

Kreu i PD Sali Berisha ka lënë ambientet e selisë së partisë dhe i është drejtuar bulevardit ku do të mbahet protesta e radhës e opozitës.

Berisha shoqërohet nga deputetë dhe eksponentë të tjerë të PD, mes edhe shumë protestuesve.

Pritet që kryedemokrati të mbajë fjalimin kryesor të protestës, ndërsa nuk dihen hapat e tjerë të vijimit të tubimit./Versus.al

Në orën 19:00 pritet të zhvillohet protesta e paralajmëruar nga Partia Demokratike përpara Kryeministrisë.

Drejtori i Përgjithshëm i Policisë së Shtetit, Skënder Hita, ka mbërritur në godinë në kuadër të planit të masave për mbarëvajtjen e tubimit.

Në zonë janë vendosur forca të shumta policie, si dhe barriera metalike rreth Kryeministrisë. Po ashtu, në terren ndodhen një ambulancë dhe autobote uji, si pjesë e masave të sigurisë.

Në protestën e sotme pritet të ketë fjalime nga drejtues të PD, përfaqësues të forumit rinor, partive aleate dhe aktivistë, ndërsa podiumi do të vendoset përpara godinës së Kryeministrisë./Versus.al

Kreu i Partisë Demokratike, Sali Berisha, ka reaguar sërish në lidhje me protestën që pritet të mbahet sot në orën 19:00.

Në një postim në Facebook, Berisha thekson se qytetarët “ngrihen me dinjitet dhe jo me dhunë”, duke e cilësuar protestën si një reagim kundër korrupsionit dhe frikës.

“Sot në 19:00, qytetarët ngrihen. Jo me dhunë, por me dinjitet. Kundër korrupsionit, kundër frikës, kundër një regjimi që mbron vjedhjet e tyre me 83 mandatet e grabitura. Shqipëria nuk hesht më”, shkruan Berisha në reagimin e tij.

Partia Demokratike mban sot protestën e radhës duke nisur nga ora 19:00. Këtë herë do të rikthehen fjalimeve pas dy protestave të cilat kanë qenë vetëm me marshime.

Berisha pritet që fillimisht të shkojë në selinë blu dhe më pas t’u bashkohet protestuesve përballë kryeministrisë ku edhe do të mbajë fjalim.

Policia ka marrë masat për mbarëvajtjen e protestës dhe duke nisur nga ora 15:00, rrugët rreth kryeministrisë do të jenë të bllokuara. Konkretisht aket në të cilat ndalohet qarkullimi i mjeteve janë:

-Bulevardi “Dëshmorët e Kombit”,

-Kryqëzimi afër Ministrisë së Brendshme deri te sheshi “Nënë Tereza”,

-Rruga “Ukraina e Lirë”,

-Rruga “Papa Gjon Pali II”,

-Rruga “Ismail Qemali”.

Nga ora 23:45 së enjtes është bllokuar lëvizja dhe penguar parkimi i automjeteve në bulevardin “Dëshmorët e Kombit”, nga “Ura e Dajtit” deri në rrugën “Ismail Qemali.” Versus.al