Pas furtunës së shkarkimeve të shkaktuar nga moskualifikimi për në fazën e Champions League, Milani vazhdon kërkimet për trajnerin e ri dhe emri i Xavi Hernandez po fiton gjithnjë e më shumë terren në listën e kandidatëve për stolin kuqezi.
Përveç Andoni Iraola, drejtuesit e Milanit po shqyrtojnë seriozisht edhe profilin e legjendës së Barcelonës.
Xavi është pa skuadër që nga viti 2024, kur përfundoi aventurën e tij si trajner i Barcelonës. Ish-mesfushori spanjoll konsiderohet një trajner me ide moderne, i lidhur ngushtë me filozofinë e posedimit të topit dhe kontrollit të lojës, stil që e bëri të famshëm si futbollist.
Si trajner, Xavi preferon skemën 4-3-3 dhe futbollin e ndërtuar nga mbrojtja, me qarkullim të shpejtë të topit, presion të lartë dhe dominim të hapësirave në fushë. Filozofia e tij është e ndikuar fuqishëm nga trashëgimia e Pep Guardiola, duke kërkuar gjithmonë superioritet numerik dhe kontroll të ritmit të ndeshjes.
Pas largimit nga Barcelona si lojtar, ai e mbylli karrierën në Katar me Al Sadd SC, klub ku nisi edhe rrugëtimin si trajner.
Interesant është fakti se Xavi ishte shumë pranë Milanit që në vitin 1999. Ish-administratori i deleguar i kuqezinjve, Adriano Galliani, kishte udhëtuar personalisht në Spanjë për të nisur negociatat me familjen e futbollistit, por Xavi refuzoi transferimin pasi dëshironte të vazhdonte ëndrrën e tij me Barcelonën.
