Trajneri i Barcelonës, Hansi Flick, ka reaguar ndaj kritikave të vazhdueshme që po merr mbrojtja e ekipit, sidomos pas golave të lehtë që kanë pësuar së fundmi, një situatë që shumë e lidhin me taktikën e tij të vijës së lartë të fazës defanzive.
Në konferencën për shtyp para ndeshjes me Alavesin, Flick vendosi t’i shpjegojë publikisht arsyetimin e tij.
“Kur humbasim dhe pësojmë tre gola, është e lehtë të thuhet se nuk ishte një ndeshje e mirë ose se nuk ishte Barça që duam të shohim”.
Sipas trajnerit gjerman, kritikat ndaj mbrojtësve janë të padrejta, pasi loja me vijë të lartë nuk është vetëm përgjegjësi e prapavijë.
“Disa njerëz nuk e kuptojnë se çfarë kërkohet për të luajtur me një vijë kaq të lartë. Është stili ynë, por nuk ka të bëjë vetëm me mbrojtësit. Sulmuesit dhe mesfushorët e nisin presingun. Kjo është ajo që unë kërkoj”.
Ai shtoi se nëse presingu nuk bëhet në mënyrë kolektive, atëherë problemet janë të pashmangshme.
“Faji bie mbi mbrojtjen, por kjo nuk është e drejtë. Nëse nuk presojmë si duhet të gjithë, atëherë do të kemi vështirësi”.
Megjithatë, Flick mbetet optimist për progresin e skuadrës.
“Kam thënë se jam optimist sepse disa gjëra i bëmë mirë, por duhet të përmirësohemi në fazën e sulmit kur fillojmë presingun.”
“Dua të shoh në ndeshje atë që shoh në stërvitje, dhe më pëlqen shumë përqendrimi i lojtarëve”, përfundoi ai.
