Regjisori Kastriot Çipi ka tërhequr vëmendjen mbi rrezikun e transmetimit të filmave pa filtrat e nevojshëm për përmbajtjen e tyre.
Në një postim në rrjetet sociale, ai shprehet se platforma Tring, në kanalin “Life”, i cili supozohet të ofrojë filma për të gjithë familjen, transmeton skena që nuk janë të përshtatshme për fëmijët.
Sipas tij, vetëm pak minuta pas fillimit të filmit “Grua e pabesë”, shfaqet një skenë ku babai është nudo përpara vajzës së tij të mitur, ndërsa nuk ka asnjë paralajmërim për prindërit.
Më tej regjisori thekson se prandaj nevojitet një institucion i fortë, i zgjedhur nga prindërit, që të klasifikojë dhe kontrollojë përmbajtjen e mediave, në mënyrë që fëmijët të mos ekspozohen ndaj skenave të papërshtatshme.
Postimi i Çipit:
Në platformën Tring, kanali Life (Jeta) supozohet të përmbajë filma, që mund të shihen me familjen.
Të dhënat e filmit "Grua e pabesë" nuk sugjerojnë asnjë lloj paralajmërimi për prindërit.
Pas 5 minutash, ti përballesh me një skenë, ku babai është nudo para vajzës së tij të mitur dhe ajo bën komentin që lexohet në foto.
E kuptoni tani pse duhet një institucion i fortë, i zgjedhur me votë nga prindërit, që klasifikon filmat dhe programet televizive në këtë vend?
PS: Personazhi i babait në film, me profesion është shkrimtar. Shkruan libra për fëmijë. Merreni me mend çfarë lloj librash shkruan një baba, që rri nudo para vajzës së vet 10 vjeçare...
Në përshkrimin që Tring ka vendosur tek filmi 'Një grua e pabesë' thuhej:
Dramë; Jeff Bridges, Kim Basinger, Jon Foster; Një film sa tragjik, aq edhe komik, i përshtatur në bazë të romanit me titullin "The door in the floor". Ngjarjet zhvillohen në Ist Hempton, në Nju Jork. Në qendër të tyre është jeta e autorit të librave për fëmijë, Ted Kole dhe gruas së tij të bukur, Marlonës./Versus.al
