Serhiy Rebrov nuk është më trajner i Kombëtarja e Ukrainës. Federata e Futbollit e Ukrainës ka njoftuar zyrtarisht përfundimin e bashkëpunimit me 51-vjeçarin, duke i dhënë fund një periudhe që zgjati rreth dy vite.
Rebrov mori drejtimin e përfaqësueses në vitin 2023, por dështimi për të siguruar një vend në Botëror, pas eliminimit në gjysmëfinalen e “play-off”-it, rezultoi vendimtar për të ardhmen e tij.
Në total, ai drejtoi Ukrainën në 34 ndeshje, duke regjistruar 16 fitore, 10 humbje dhe 8 barazime. Megjithatë, rezultatet e fundit dhe objektivat e parealizuara sollën reagim të fortë nga tifozët, të cilët kërkuan largimin e tij.
Ironikisht, kërkesat për shkarkim u shtuan menjëherë pas fitores në një miqësore ndaj Kombëtarja e Shqipërisë në fund të marsit, duke treguar pakënaqësinë e akumuluar prej kohësh.
Vendimi final për ndarjen mes palëve u mor rreth tri javë më vonë, duke mbyllur zyrtarisht kapitullin e Rebrov në krye të Ukrainës.
