Rusia ka filluar një goditje ndaj “vejushave të zeza”, grave që kërkojnë të martohen me ushtarë për të marrë në rast të vdekjes së 'burrit të tyre' në frontin e Ukrainës, një kompensim të madh deri në 170.000 euro, ekuivalent me rreth 20 herë më shumë se paga mesatare vjetore në vend.
Sipas një hetimi nga Wall Street Journal, disa raste të tilla janë paraqitur tashmë në gjykatat ruse. "Vejushat e zeza" paditen shpesh nga familjet e ushtarëve të vrarë në betejë, të cilët më pas privohen nga çdo kompensim.
Një rast veçanërisht domethwnws është ai i 40-vjeçarit Sergei Chandozhko. Ai u martua në tetor 2023, një ditë pas rekrutimit në ushtri. Familja dhe miqtë e tij mbetën të shtangur: ata nuk kishin dëgjuar kurrë për një të fejuar apo ndonjë plan për martesë. Ceremonia, e cila zgjati vetëm njëzet minuta, u zhvillua pa shkëmbim unazash, pa foto dhe vetëm me një dëshmitar. Sipas dokumenteve të gjykatës, nusja më pas thjesht u kthye për të jetuar me ish-burrin e saj dhe fëmijët e tyre.
Dyshimet lindën vërtet pas vdekjes së Sergei Chandozhko në frontin ukrainas. E veja e tij mori më pas një pagesë të konsiderueshme në rast vdekjeje: 170.000 euro, ekuivalente me rreth njëzet herë më shumë se paga mesatare vjetore në Rusi.
Dasma u anulua
Një gjyqtar vendosi më parë këtë vit se gruaja e kishte mashtruar ushtarin që të martohej me të vetëm për të trashëguar pasurinë e tij. Prandaj, martesa u anulua dhe gruaja u gjobit me 32 euro!! Që atëherë ajo e ka apeluar vendimin.
Ky është vetëm një shembull midis shumë gjyqeve që përfshijnë "vejushat e zeza", një term që u shfaq për shkak të përhapjes së këtij fenomeni në Rusi. Këto gra, ose rrjetet të cilave u përkasin, shpesh rekrutojnë nëpërmjet mediave sociale. Në VKontakte, rrjetin kryesor social të Rusisë, dhjetëra grupe u kushtohen grave që kërkojnë të martohen me ushtarë të dislokuar në Ukrainë.
Sanksione më të rrepta
Parlamenti rus dëshiron gjithashtu të marrë masa të ashpra ndaj "vejushave të zeza". Janë paraqitur disa projektligje për të rritur dënimet për këta mashtrues ose për të ulur shumën e kompensimit që ata marrin. Ky kompensim mbetet veçanërisht i lartë për shkak të vështirësive të Rusisë në rekrutimin e ushtarëve të gatshëm për të luftuar në Ukrainë dhe për të rrezikuar jetën e tyre.
