Këshilli i Ministrave ka miratuar disa ndryshime dhe shtesa në rregulloren e Garda e Republikës së Shqipërisë, duke vendosur kufizime të reja për angazhimin politik të efektivëve të saj.
Vendimi, i firmosur nga kryeministri Edi Rama, prek nenin 158 të rregullores së vitit 2021 dhe synon forcimin e rregullave të sjelljes dhe neutralitetit politik të punonjësve të Gardës.
Sipas ndryshimeve të reja, punonjësve të Gardës u ndalohet të mbështesin parti politike, kandidatë apo organizata, si edhe të shprehin publikisht bindje politike. Gjithashtu, ata nuk lejohen të marrin pjesë në tubime apo mbledhje politike, edhe kur nuk janë në shërbim.
Vendimi parashikon gjithashtu se efektivët e Gardës nuk mund të kandidojnë apo të zgjidhen në funksione politike pa hequr dorë më parë nga detyra. Megjithatë, atyre u njihet e drejta për t’u organizuar në sindikata për mbrojtjen e interesave profesionale.
Zbatimi i vendimit i është ngarkuar Ministrisë së Punëve të Brendshme dhe vetë Gardës së Republikës, ndërsa ai hyn në fuqi pas botimit në “Fletoren Zyrtare”.
V E N D I M
PËR DISA NDRYSHIME DHE SHTESA NË VENDIMIN NR.777, DATË 15.12.2021, TË KËSHILLIT TË MINISTRAVE, “PËR MIRATIMIN E RREGULLORES SË GARDËS SË REPUBLIKËS SË SHQIPËRISË”
Në mbështetje të nenit 100 të Kushtetutës dhe të nenit 70, të ligjit nr.33/2021, “Për Gardën e Republikës së Shqipërisë”, të ndryshuar, me propozimin e ministrit të Punëve të Brendshme, Këshilli i Ministrave
V E N D O S I:
I. Në pikën 13, të nenit 158, të rregullores, që i bashkëlidhet vendimit nr.777, datë 15.12.2021, të Këshillit të Ministrave, bëhen këto ndryshime dhe shtesa:
1. Fjalët “… së përditshme duhet të zbatojë normat e sjelljes …” zëvendësohen me “… së tij, zbaton rregullat …”.
2. Shkronja “dh” ndryshohet, si më poshtë vijon:
“dh) të mos mbështesë fushatën e një partie, organizate politike, të një anëtari të një partie politike apo të një kandidati të pavarur, duke marrë pjesë ose duke kontribuuar fizikisht ose financiarisht, dhe të mos shprehë publikisht bindje apo preferenca politike. Punonjësit të Gardës i ndalohet të marrë pjesë, edhe nëse nuk është në shërbim, në mbledhje e në tubime të partive, të shoqatave dhe të organizatave politike.”.
3. Pas shkronjës “e” shtohen shkronjat “ë”, “f” dhe “g”, me këtë përmbajtje:
“ë) Ka të drejtë të organizohet në sindikata për të mbrojtur interesat e tij profesionalë dhe të drejtat e përcaktuara në legjislacionin në fuqi;
f) Të mos kandidojë dhe të mos zgjidhet, pa hequr dorë më parë nga detyra, në funksione politike;
g) Të mos kryejë veprimtari politike, pavarësisht nëse veprimtaria kryhet në bashkëpunim me ndonjë parti politike ose jo, si dhe të mos kryejë veprimtari, që përbën konflikt interesi apo që mund të krijojë përshtypjen se punonjësi i Gardës së Republikës është i njëanshëm dhe i ndikuar.”.
II. Ngarkohen Ministria e Punëve të Brendshme dhe Garda e Republikës së Shqipërisë për zbatimin e këtij vendimi.
Ky vendim hyn në fuqi pas botimit në “Fletoren zyrtare”./Versus.al
