Deklarata e kryetarit të grupit parlamentar të PS, Taulant Balla, se i takon grupit të gjykojë dhe të marrë një vendim për mospjesëmarrjen e Elisa Spiropalit në seancën ku do të votohej për rrëzimin e kërkesës së SPAK për imunitetin e Belinda Ballukut, ka shkaktuar një reagim inatçor të Spiropalit.
Me një ton kërcënues ndaj deklaratës së Ballës se do të mbledhë grupin parlamentar për këtë çështje, Spiropali shkruan në faqen e saj në Facebook: "Jam plotësisht dakord. Nëse çështja kërkon konsultim me grupin parlamentar, atëherë është pikërisht ajo që duhet bërë pa vonesë. Thirre grupin dhe zhvillojmë një diskutim të plotë".
Deri tani, qëndrimet e Spiropalit kanë ngjasuar me një kryengritje të heshtur që prej shkarkimit të saj nga posti i ministres së jashtme. E vetmja deklaratë thumbuese ndaj kryeministrit Edi Rama ishte ajo e bërë në Kuvend, ku tha se Sali Berisha e dinte më parë shkarkimin e saj.
Por nëse ndaj Ramës nuk ka guxuar të tentojë një përballje direkte, Spiropali tani i është vërsulur Taulant Ballës, duke iu kanosur me debate në mbledhjen e grupit parlamentar të paralajmëruar prej tij.
Qëndrimet e ish-ministres së jashtme duket se janë radikalizuar pasi Edi Rama e shkarkoi edhe nga funksioni si drejtuese politike e Kavajës, ndërsa në mbledhjen e fundit të Asamblesë Socialiste rezultati zgjedhor i Kavajës nën drejtimin e Spiropalit u konsiderua ndër më të dobëtit që PS mori në zgjedhjet parlamentare të 2025. Versus.al
