Kryeministri Edi Rama ka reaguar sërish lidhur me aksionin për çlirimin e hapësirave publike, duke zhvilluar një komunikim të drejtpërdrejtë me qytetarët në rrjetet sociale. Në fjalën e tij, ai theksoi se ky aksion nuk do të mbetet i kufizuar vetëm në Vlorë, por do të shtrihet në qytete të tjera si Tirana, Durrësi, Shkodra dhe Fieri.
“Është krejtësisht e papranueshme që hapësirat publike të zihen, që trotuaret të shndërrohen në prona private për përfitim personal, apo që qytetarët të detyrohen të paguajnë për hapësira publike të përdorura si parkim privat”, u shpreh Rama.
Kreu i qeverisë theksoi se mbështet sipërmarrjet dhe iniciativën private, por jo në dëm të interesit publik. Ai e cilësoi ndërhyrjen në Vlorë si një shembull që do të pasohet edhe në qytete të tjera, me qëllim rikthimin e hapësirave të përbashkëta te qytetarët.
Në këtë komunikim, Rama iu referua edhe problematikës së furnizimit me ujë të pijshëm në qytetin bregdetar të Vlorës, të cilën e konsideroi si rezultat të paaftësisë dhe mungesës së përgjegjësisë nga institucionet përgjegjëse.
“Vlora nuk ka mungesë uji, por ka vuajtur nga paaftësia dhe paturpësia që ka penguar një furnizim normal me ujë për qytetarët,” tha ai, duke shtuar se situata nuk mund të tolerohet më.
Sipas kryeministrit, ka ardhur koha për një riorganizim të thellë, si në nivelin lokal ashtu edhe në atë qendror, për të garantuar një administrim më të drejtë dhe më efikas në shërbim të qytetarëve. Ai paralajmëroi se periudha në vijim do të shënojë sfida të rëndësishme, por edhe ndryshime të domosdoshme që do të sjellin përfitime konkrete për komunitetet në të gjithë vendin.
Kryeministri Edi Rama ka reaguar sërish lidhur me çështjen e ndërtimit të paligjshëm në Theth, ku 10 kabina, sipas tij pa leje ndërtimi, janë tashmë hequr. Në një deklaratë publike, Rama theksoi se Ministria e Drejtësisë po përgatit dokumentacionin për të kërkuar nga Këshilli i Lartë i Prokurorisë (KLP) nisjen e hetimeve jo vetëm ndaj prokurores së çështjes, por edhe ndaj të gjithë Prokurorisë së Shkodrës.
Rasti Thethi
“Është e papranueshme dhe shqetësuese ajo që ka ndodhur në Theth. Strukturat shtetërore që ndërhynë për të mbrojtur ligjin janë braktisur nga një prokurore, ndërkohë që e gjithë Prokuroria e Shkodrës duket se i del në mbrojtje,” tha Rama.
Ai kritikoi ashpër arsyetimin e organit të akuzës, duke vënë në dukje mungesën e logjikës në vendimmarrje: “Në shkollë këta njerëz mësojnë edhe një lëndë që quhet logjikë. Por në këtë rast, ajo që mungon më shumë është pikërisht logjika. Kjo mungesë nuk është thjesht teknike – ajo përkthehet në dëme të mëdha për komunitetin, për qytetarët, për pasurinë publike dhe për imazhin e Shqipërisë në sytë e vizitorëve.”
Rama u ndal veçanërisht tek reagimi i turistëve që ndodhen në Theth, të cilët sipas tij janë dëshmitarë të një situate të turpshme: “Çfarë përshtypjeje u lëmë qindra turistëve që në mes të Thethit shohin fadromat duke prishur një ndërtim të paligjshëm, plagë e hapur nga një individ i papërgjegjshëm që ka kryer një krim të shumëfishtë dhe që ende sot nuk është identifikuar, për shkak se prokurorja e çështjes ka vendosur të mos fillojë hetimin.”
Sipas kryeministrit, kjo qasje është një sinjal alarmi për funksionimin e drejtësisë në vend dhe kërkon përgjegjësi të qarta institucionale. Ai paralajmëroi se rastet e tilla nuk do të tolerohen, dhe theksoi se shteti do të vazhdojë të veprojë për mbrojtjen e ligjit, mjedisit dhe të së mirës publike.
