Dje Kuvendi i Republikës së Kosovës ishte shënjestra e një kërcënimi për bombë, i cili po trajtohet si një sulm hibrid ndaj institucioneve shtetërore. Lajmin e ka bërë të ditur Ministri i Punëve të Brendshme, Xhelal Sveçla, përmes një deklarate publike.
Sipas Sveçlës, kërcënimi është bërë nga një numër telefoni i regjistruar në Serbi, që i përket kompanisë telefonike MTS. Hetimet e deritanishme kanë identifikuar se numri është përdorur nga shtetasi serb Lazar Živković. Për më tepër, në disa profile të lidhura me këtë numër, është vërejtur edhe fotografia e kriminelit të dënuar të luftës, Ratko Mladić.
Ministri Sveçla theksoi se institucionet e sigurisë së Kosovës po e trajtojnë rastin me përparësi të lartë dhe do të kërkojnë mbështetje ndërkombëtare për të siguruar arrestimin dhe ndjekjen penale të personave përgjegjës, sa më shpejt që të jetë e mundur.
“Sulmuesit dhe kërcënuesit që strehohen në Serbi, pavarësisht mbështetjes që mund të kenë nga shteti serb, nuk do të arrijnë t’i shmangen përgjegjësisë,” theksoi Sveçla.
Rasti nënvizon edhe një herë rrezikun që paraqesin sulmet hibride dhe nevojën për bashkëpunim rajonal dhe ndërkombëtar në përballje me kërcënimet ndaj sigurisë dhe rendit kushtetues të Kosovës.
