Detaje të reja kanë dalë nga hetimet për ngjarjen tragjike në malin e Bodesë, ku humbi jetën efektivi i Policisë së Shtetit, Enea Mekolli, ndërsa mbeti i plagosur kolegu i tij, Edison Adri.
Sipas dosjes hetimore, operacioni për kapjen e 43-vjeçarit Violand Braçellari u organizua pas denoncimit të një 32-vjeçari, i cili pretendoi se ishte dhunuar dhe kërcënuar me armë nga Braçellari.
Mëngjesin e 4 qershorit, forcat e policisë rrethuan zonën ku ai qëndronte, pranë stallave të bagëtive.
Hetimet tregojnë se pa përfunduar rrethimi, 43-vjeçari hapi zjarr ndaj efektivëve.
Nga të shtënat mbeti i vrarë Enea Mekolli dhe u plagos Edison Adri. Pas shkëmbimit të zjarrit, autori tentoi të largohej, por u kap i plagosur disa metra larg vendit të ngjarjes.
Nga këqyrja e vendit rezultoi se efektivi Mekolli kishte marrë disa plagë nga armë zjarri në pjesë të ndryshme të trupit.
Pranë tij u gjet arma e shërbimit me të gjithë fishekët e papërdorur, fakt që sipas hetuesve tregon se ai nuk arriti të qëllonte gjatë sulmit.
Ndërkohë, arma e efektivit të plagosur Edison Adri rezultoi të ishte përdorur gjatë përplasjes.
Në zonë u sekuestruan armë, gëzhoja dhe prova të tjera materiale, ndërsa hetimet vijojnë për të dokumentuar plotësisht rrethanat e ngjarjes./Versus.al
