Një pikë shërbimesh celulare dhe pagesash është grabitur pasditen e kësaj të premteje në qytetin e Durrësit.
Sipas të dhënave paraprake, një i ri ka hyrë në ambientet e biznesit dhe, pasi ka kërcënuar punonjësen, ka marrë paratë që ndodheshin në arkë, të cilat dyshohet se ishin xhiroja ditore, e më pas është larguar në drejtim të paditur.
Burime nga vendi i ngjarjes bëjnë me dije se autori nuk ka përdorur armë apo ndonjë mjet tjetër gjatë grabitjes, por vetëm ka kërcënuar punonjësen për të marrë paratë.
Menjëherë pas denoncimit, shërbimet e Policisë së Durrësit kanë mbërritur në vendngjarje dhe kanë nisur hetimet. Uniformat blu kanë sekuestruar pamjet e kamerave të sigurisë dhe po mbledhin dëshmi që mund të ndihmojnë në identifikimin dhe kapjen e autorit.
Grupi hetimor vijon punën për zbardhjen e plotë të rrethanave të ngjarjes, ndërsa policia është vënë në ndjekje të autorit të dyshuar./Versus.al
