Trazira dhe tension i lartë përfshinë burgun famëkeq të Korydallos në Greqi, mëngjesin e së hënës, kur një i burgosur shqiptar, i njohur për përfshirjen e tij në vrasjen e avokatit Michalis Zafeiropoulos, sulmoi një roje burgu në një përpjekje për të realizuar një plan të organizuar nga brenda qelisë.
I dënuari, i cili sipas autoriteteve ka pasur konflikte të përsëritura me bashkëkombës të tij në burg, është afruar kohët e fundit me një grup të burgosurish nga Afrika e Veriut, duke formuar një grup të veçuar me ndikim në strukturat e brendshme të burgut.
Sipas burimeve nga brenda institucionit, mëngjesin e sotëm ai dhe disa të burgosur të tjerë tentuan të lëviznin drejt Krahut C të burgut për t’u përballur me të burgosurit shqiptarë me të cilët kishin konflikte të hapura. Gjatë përpjekjes, ata shtynë një roje dhe me njohuri të mëparshme për panelin e kontrollit, arritën të hapnin derën që të çonte drejt sektorit tjetër.
Për fat të mirë, ndërhyrja e shpejtë e rojës së sulmuar, i cili arriti të aktivizonte menjëherë alarmin, shmangu një përplasje të mundshme dhe çoi në neutralizimin e situatës nga stafi i sigurisë. I dënuari shqiptar u imobilizua dhe u rikthye në qelinë e tij, ndërsa autoritetet pritet të ndërmarrin masa shtesë sigurie ndaj tij.
Ky incident nxjerr në pah tensionet etnike dhe përçarjet që dominojnë brenda burgjeve greke, si dhe rrezikun që paraqesin grupet e organizuara të të dënuarve që sfidojnë autoritetin e institucioneve korrektuese.
