Kryebashkiakun e Tiranës e viziton më shpesh në burg nëna e tij.
Kështu ka deklaruar avokati i Erion Veliajt, Plarent Ndreca i cili tha se mamaja e tij është aty në çdo moment.
“Madje edhe kur pati një problem me krahun, ajo shkoi përsëri atje, për të takuar djalin”, rrëfeu avokati.
Ndreca tha se Veliaj është i përgatitur për t’i shkuar deri në fund këtij procesi edhe për të mbrojtur të drejtat e qytetarëve, pasi mendon se janë shkelur të drejtat dhe po padrejtësisht qëndron në qeli.
“Unë mendoj se do jetë betejë e gjatë dhe e vështirë. E thashë se sistemi tani po punon që të mbulojë gabimet e të shkuarës. Por do jetë një betejë që ne do e çojmë deri në fund për ta shpallur zotin Veliaj të pafajshëm.
Zoti Veliaj është dyfish i motivuar, unë jam i përgatitur ashtu edhe ai, për ta çuar deri në fund dhe të triumfojë e vërteta. Ne jemi të qartë që ata do e bëjnë punën e tyre, por edhe ne do bëjmë punën tonë dhe jemi në aleancë me publikun, ndaj do donim që edhe publiku ta dëgjojë”, tha ai mes të tjerash.
I pyetur se çfarë priste Veliaj nga vendimi i Gjykatës së Lartë dhe nëse ishte i përgatitur për rrëzimin e kërkesës, Ndreca u shpreh se Veliaj është i bindur çdo ditë që nuk duhet të jetë në qeli.
“Referuar asaj që po ndodh edhe në sistemin e drejtësisë, ne jemi me këmbë në tokë, e dimë që do jetë e gjatë, se çfarë problematikash ka sistemi, zoti Veliaj është koshient për këtë. Zoti Veliaj po lufton edhe për ata qytetarë që nuk u respektohen të drejtat për një proces të rregullt”, tha Ndreca. Versus.al
