Një shtetas shqiptar nga Kosova, që udhëtonte nga Zvicra drejt vendlindjes, ka shkaktuar panik në bordin e avionit duke tentuar të hapë derën e emergjencës në mes të fluturimit. Veprimi i tij i rrezikshëm ka alarmuar menjëherë pasagjerët dhe stafin e bordit.
Sipas dëshmitarëve, disa udhëtarë kanë ndërhyrë me shpejtësi për ta ndaluar të riun. Në përpjekje për të shmangur një tragjedi të mundshme, disa persona janë hedhur mbi të duke e mbajtur nën kontroll. Dy pasagjerë të tjerë kanë ndërhyrë me forcë për ta neutralizuar plotësisht, deri në mbërritjen e autoriteteve.
Policia ka ndërhyrë menjëherë pas uljes së avionit dhe ka arrestuar të dyshuarin. Gjatë incidentit, i riu ka ofenduar verbalisht pasagjerët dhe ka folur me tone agresive, duke vështirësuar edhe më shumë situatën.
Reagimet pas ngjarjes nuk kanë munguar. Pasagjerët e pranishëm kanë shprehur shqetësimin dhe indinjatën e tyre për situatën e rrezikshme, duke theksuar se ndihma e ndërsjellë mes tyre ishte vendimtare për të shmangur pasojat. “Ka qenë një moment shumë i frikshëm. Falë Zotit dhe reagimit të shpejtë të disa udhëtarëve, gjithçka u vu nën kontroll pa pasoja tragjike”, është shprehur një pasagjer.
Ndërkohë, autoritetet kanë nisur hetimet për të zbardhur motivet e veprimit të të dyshuarit, si dhe për të përcaktuar nëse ai paraqiste rrezik për sigurinë publike apo vuante nga ndonjë gjendje psikologjike.
Kompania ajrore ka falënderuar pasagjerët dhe stafin për reagimin e shpejtë dhe profesional, duke theksuar se siguria e udhëtarëve mbetet prioritet absolut.
