Gjykata e Rrethit Gjyqësor Durrës ka vendosur masën e sigurisë “arrest me burg” për Xhevdet Plakun, i njohur ndryshe me nofkën “Akili”, dhe katër shtetas të tjerë, ndërsa një tjetër është lënë në masën e “detyrimit për paraqitje”. Vendimi erdhi pas një operacioni policor të zhvilluar dy ditë më parë në zonën bregdetare të Gjirit të Lalëzit, ku u godit një grup kriminal i dyshuar për veprimtari të paligjshme.
Gjykata ka vendosur 'arrest në burg' për Xhevdet Plakun, Voltan dhe Jugert Xhani, Fatjon Qesja, Oltion Hasani, Flobenc Meçja (Gega) ndërsa për Alfred Hasanajn është vendosur masa "detyrim paraqitjeje" dhe ndalim daljeje jashtë vendit.
Xhevdet Plaku, një emër i njohur për drejtësinë shqiptare dhe ndërkombëtare, është konsideruar si një figurë e rëndësishme në trafikun ndërkombëtar të drogës. Ai ka qenë subjekt hetimesh në disa shtete të BE-së, përfshirë Italinë dhe Holandën, dhe rezulton të ketë përdorur mbi 25 identitete të ndryshme për të shmangur kapjen nga autoritetet.
Operacioni i fundit i policisë, që çoi në arrestimin e Plakut dhe bashkëpunëtorëve të tij, është vlerësuar si një sukses i rëndësishëm në luftën kundër grupeve kriminale që operojnë në territorin shqiptar, veçanërisht në zonat turistike që shpesh përdoren për veprimtari të paligjshme gjatë sezonit veror.
Sipas burimeve zyrtare, Plaku ishte arratisur në janar të këtij viti nga një burg në Ankona, Itali, ku po vuante një dënim për trafik droge. Ai kishte përfituar nga lehtësitë e dhëna për sjellje të mirë dhe ishte larguar gjatë një daljeje jashtë burgut, pa u kthyer më.
Ndërkohë, emri i tij është përmendur edhe në një atentat të dështuar në Durrës në vitin 2019, për të cilin janë dënuar disa persona, përfshirë edhe një ish-zyrtar policie. Sipas hetimeve, atentati dyshohet se ishte organizuar nga një grup rival për të eliminuar Plakun, por tentativa dështoi.
Pritet që Prokuroria të zgjerojë hetimet për të zbuluar rrjetin e plotë të lidhjeve të grupit të drejtuar nga Plaku, si dhe burimin e financimit dhe bashkëpunëtorët e tjerë brenda dhe jashtë vendit. Arrestimet e fundit janë pjesë e një serie operacionesh që synojnë goditjen e strukturave të krimit të organizuar dhe pastrimin e zonave turistike nga aktivitetet kriminale. /Versus.al/
