Policia e Shkodrës ka finalizuar operacionin e koduar “SHADOWS”, duke zbardhur vrasjen me lëndë eksplozive të Hysni Ymerit, ngjarje që tronditi lagjen “Manush Alimani” më 29 dhjetor 2025.
Katër persona, të moshës 24–27 vjeç, janë vënë në pranga si të dyshuar kryesorë: Gerti Bushati, Ergys Ibrahimi, Edison Hasaj dhe Gjergji Zefi.
Hetimet e policisë dhe Prokurorisë së Shkodrës zbuluan se vrasja u krye me telekomandim të një lënde eksplozive të vendosur në panelin elektrik të pallatit ku banonte Ymeri, kundrejt pagesës dhe në bashkëpunim me njëri-tjetrin.
Gjatë kontrolleve u sekuestruan 28 celularë, një automjet “Mercedes-Benz”, municion, lëndë narkotike dhe kokainë, pajisje GPS, kamera sigurie, rroba të përdorura nga autori, si dhe një laptop.
Policia njofton se hetimet vijojnë për identifikimin e personave të tjerë të përfshirë dhe për sqarimin e motiveve, ndërsa materialet procedurale iu referuan Prokurorisë për veprat penale: “Vrasja me paramendim e kryer në bashkëpunim”, “Shkatërrimi i pronës me eksploziv”, “Mbajtja pa leje dhe prodhimi i armëve, armëve shpërthyese dhe i municionit”, “Prodhimi dhe shitja e narkotikëve” dhe “Prishja e qetësisë publike”.
Njoftimi i policisë:
Shkodër/ Finalizohet operacioni policor i koduar “SHADOËS”.
Zbardhet vrasja me lëndë eksplozive e shtetasit H. Y., e kryer më datë 29.12.2025, në lagjen “Manush Alimani”. Identifikohen, kapen dhe vihen në pranga 4 shtetas, të dyshuar si autorë të kësaj vrasjeje.
Operacioni u zhvillua me mbështetjen e Forcës Kombëtare të Sigurisë, Njësia Shkodër, Forcës së Posaçme “Shqiponja”, shërbimeve të Komisariatit të Policisë Shkodër dhe atyre të DVP Shkodër.
Si rezultat i një pune intensive operative dhe hetimore, të kryer nga strukturat e Drejtorisë Vendore të Policisë Shkodër, nën drejtimin e Prokurorisë së Shkodrës, me qëllim zbardhjen e dinamikës dhe autorësisë së vrasjes së shtetasit H. Y., bazuar në provat e siguruara, u finalizua operacioni policor i koduar “SHADOËS”.
Në kuadër të këtij operacioni, u kapën dhe u vunë në pranga shtetasit:
-G. B., 27 vjeç
-E. I., 27 vjeç
-E. H., 25 vjeç
-Gj. Z., 24 vjeç
Ndalimi i tyre u bë pasi ka dyshime të bazuara dhe të mbështetura në prova se këta shtetas, kundrejt pagesës, në bashkëpunim me njëri-tjetrin, më datë 29.12.2025, duke përdorur lëndë eksplozive (e dyshuar me telekomandim në distancë), kanë shpërthyer panelin elektrik të pallatit ku banonte shtetasi H. Y.
Gjatë veprimeve procedurale, kontrolleve të vendeve dhe ambienteve, si dhe kontrolleve personale, janë gjetur dhe sekuestruar, në cilësinë e provave materiale: 28 celularë, 1 automjet “Mercedes-Benz”, rrobat e veshura nga autori i dyshuar që ka vendosur lëndën eksplozive, municion luftarak, një sasi monetare në lekë dhe euro, një sasi lënde narkotike, një sasi lënde kokaine, 3 pajisje gjurmuese GPS, 2 kamera sigurie dhe 1 laptop.
Vijon puna për zbulimin e personave të tjerë të implikuar në këtë ngjarje dhe dokumentimin e plotë të saj, si dhe sqarimin e motiveve.
Materialet procedurale iu referuan Prokurorisë së Shkodrës për veprat penale: “Vrasja me paramendim”, e kryer në bashkëpunim;
“Shkatërrimi i pronës me eksploziv”;
“Mbajtja pa leje dhe prodhimi i armëve, armëve shpërthyese dhe i municionit”;
“Prodhimi dhe shitja e narkotikëve”, e kryer në bashkëpunim;
dhe “Prishja e qetësisë publike”./ Versus.al
