Të shtëna me armë zjarri janë raportuar pranë konsullatës së Izraelit në Stamboll, në zonën e Beşiktaş, duke vënë në alarm forcat e sigurisë turke.
Sipas informacioneve të para, tre persona të armatosur kanë hapur zjarr jashtë përfaqësisë diplomatike izraelite. Menjëherë në vendngjarje kanë mbërritur forca të shumta policie, të cilat kanë ndërhyrë për të vënë situatën nën kontroll.
Gjatë shkëmbimit të zjarrit, dy efektivë policie kanë mbetur të plagosur. Gjendja e tyre raportohet të jetë jashtë rrezikut për jetën.
Mediat turke bëjnë të ditur se tre të dyshuar janë neutralizuar: dy prej tyre janë vrarë gjatë përplasjes me armë, ndërsa një tjetër ka mbetur i plagosur.
Pas incidentit, forcat e sigurisë kanë rrethuar të gjithë perimetrin përreth konsullatës dhe kanë kufizuar lëvizjen e këmbësorëve dhe automjeteve në zonë, për të garantuar sigurinë publike dhe për të shmangur çdo rrezik të mëtejshëm.
Autoritetet turke kanë nisur hetimet dhe pritet të japin informacione të mëtejshme mbi rrethanat dhe motivin e ngjarjes.
Ndërsa ministri i brendshëm turk është shprehur se autorët janë identifikuar, ku dy prej tyre janë vëllezër.
"Tre persona që u përfshinë në një përleshje të armatosur me oficerët tanë të policisë në detyrë përpara blloqeve të ndërtesave Yapı Kredi Plaza në Stamboll u neutralizuan. Dy nga oficerët tanë heroikë të policisë u plagosën lehtë. Autorët janë identifikuar. Është përcaktuar se njëri prej individëve, i cili erdhi në Stamboll nga Nikomedia me një makinë me qira, ka lidhje me një organizatë që shfrytëzon fenë dhe se njëri nga dy terroristët, të cilët janë vëllezër, ka një histori të trafikimit të drogës." shkruan në rrjete sociale ministri i Brendshëm turk, Mustafa Çifci./Versus.al
View this post on Instagram
